341. மருத்துவ மாணவி கௌசல்யாவுடன் சந்திப்பு

அன்பு நண்பர்களே,

சிரமம் பார்க்காமல், எனது இப்பதிவை வாசித்து விடும்படி ஒரு வேண்டுகோளுடன்,

கௌசல்யாவின் மருத்துவப் படிப்புக்கு வேண்டி, உங்களிடம் பொருளுதவி பெற்று, அதை அவருக்கு வழங்கியது குறித்த என் பதிவை வாசித்திருப்பீர்கள்.  அவர் இப்போது ஸ்டான்லி மருத்துவக் கல்லூரியில் இரண்டாமாண்டு படிக்கிறார். சமயம் கிடைக்கும்போது, அவரை சந்தித்து பேசி வருகிறேன். நன்றாக படிக்குமாறு (உங்கள் சார்பில்) அறிவுரையும் தந்து வருகிறேன்!!!

கௌசல்யா ஆங்கிலத்தில் நல்ல தேர்ச்சி பெற, ஒரு ஆங்கிலப் பயிற்சி மையத்தில் விசாரித்து, அவரை ஒரு தபால் வழி பயிற்சிப் படிப்பில் சேர்த்து விட்டிருக்கிறேன். நான் அறிந்தவரை, முதலில் பார்த்ததை விட தற்போது கௌசல்யாவின் நடை உடை பாவனைகளில் நல்ல முன்னேற்றம் காணப்பட்டது, மன உறுதியும், தன்னம்பிக்கையும் கூடியிருப்பதாகத் தோன்றியது.

பத்து நாட்கள் முன்பு, கௌசல்யாவின் அழைப்பின் பேரில் அவரது ஸ்டான்லி மருத்துவ விடுதியின், 'ஹாஸ்டல் டே' விழாவுக்கு என் மகளுடன் சென்றிருந்தேன்.  பிற மாணவிகள் தமதமது பெற்றோரை அவ்விழாவுக்கு அழைத்திருப்பதாக, கௌசல்யா கூறியிருந்தார். அதனால், கௌசல்யாவின் (உங்கள் சார்பு) ரெப்ரெசண்டேடிவ் ஆக நான் நிச்சயம் செல்ல வேண்டும் என்று முடிவு செய்து, அதன்படி (முக்கியமான சமயங்களில் என்னை சங்கடப்படுத்தும் ஒற்றைத்  தலைவலி படுத்தியபோதும்:)) விழாவுக்குச் சென்றேன். கௌசல்யாவுக்கு மிக்க மகிழ்ச்சி.

விழாவுக்கு அமைச்சர் பூங்கோதையும், நடிகர்கள் ஸ்ரீகாந்தும், பசுபதியும் வருகை தந்தனர்.  ஏற்கனவே நடந்து முடிந்த போட்டிகளில் வெற்றி பெற்ற மாணவிகளுக்கு பரிசுகள் வழங்கப்பட்டதைத் தொடர்ந்து, கலை நிகழ்ச்சி ஒன்று நடைபெற்றது. வருங்கால மருத்துவர்கள் சிறப்பாக நடனமாடினர் :)  டின்னரும் ஏற்பாடு செய்யப்பட்டிருந்தது.  விழா முடியும் வரை நாங்கள் இருந்தது குறித்து, கௌசல்யாவுக்கு அளவிட முடியாத மகிழ்ச்சி, என் மகளிடமும் மிகுந்த அன்பு காட்டினார்.  தலைவலியை சமாளிப்பது அவ்வளவு கடினமான விஷயமாகத் தோன்றவில்லை!!!

 'கௌசல்யா' நிதி குறித்த வரவு/செலவு கணக்கு விவரங்களை, பொருளுதவி செய்த நண்பர்களுக்கு மடல் வழி அனுப்பி விட்டேன்.  இவ்வருடம், கௌசல்யா தவிர இன்னும் 3 மாணவ/மாணவிகளுக்கு உதவ உத்தேசம். கல்வி உதவி கேட்டு சில கோரிக்கைகள் வந்துள்ளன. அவை குறித்து விசாரித்து, அவர்கள் படிப்பு மற்றும் குடும்ப சூழலை கணக்கில் கொண்டு, உங்களுக்கு தகவல் அளித்து, பின் உங்கள் சம்மதத்துடன்/அனுமதியுடன், அவர்களுக்கு உதவுவதே என் விருப்பமும், ராம்கியின் விருப்பமும்.

இந்த வருட முடிவில், உங்களிடம் மீண்டும் உதவி கேட்டு என் வேண்டுகோளை முன் வைக்க உத்தேசம்.  எப்போதும் போல உங்கள் ஆதரவு கிடைக்கும் என்ற நம்பிக்கை இருக்கிறது. தற்சமயம் நிதி கைவசம் உள்ளது.

மீண்டும் உதவி செய்த நண்பர்களுக்கும், கௌசல்யா வாழ்வில் முன்னேற வாழ்த்தும் நெஞ்சங்களுக்கும் உளமார நன்றியையும், வாழ்த்துக்களையும் தெரிவித்துக் கொள்கிறேன் !

என்றென்றும் அன்புடன்
பாலா

*** 341 ***

340. லாராவைத் தொடர்ந்து சச்சினும் கிரிக்கெட்டிலிருந்து ஓய்வு!

சற்று முன் ஒரு செய்தி:
-------------------------------
வெஸ்ட் இண்டீஸ் அணியின் கேப்டனும், பல சாதனைகள் புரிந்தவருமான பிரையன் சார்லஸ் லாரா, டெஸ்ட் மற்றும் ஒரு நாள் பந்தயங்களிலிருந்து ஓய்வு பெற்றதின் தொடர்ச்சியாக, நமது ஸ்டார் ஆட்டக்காரரும், ஒரு நாள் மற்றும் டெஸ்ட் போட்டிகளில் சேர்த்து கிட்டத்தட்ட 75 சதங்கள் அடித்து சாதனை படைத்தவரும் ஆன சச்சின் ரமேஷ் தெண்டுல்கர், உலகக் கோப்பையின் முதல் ரவுண்டிலேயே இந்தியா அவமானகரமாக வெளியேறிய காரணத்தை முன்னிட்டு, தான் கிரிக்கெட்டிலிருந்து ஓய்வு பெறப் போவதாக எந்த ஒரு அறிவிப்பையும் இது வரை வெளியிடாத காரணத்தாலும் , எனது பிளாக் கவுண்டர் சரியாக ஓடுகிறதா என்பதை செக் செய்ய இதை விட பெட்டராக எதுவும் எனக்குத் தோன்றாததாலும், வலையுலக சச்சின் போல எனக்கும் பின்னூட்ட ஆசை திடீரென்று முளைத்ததாலும், ஏப்ரல் முதல் தேதி நான் பிஸியாக இருந்த காரணத்தாலும், இப்பதிவை எழுத வேண்டிய கட்டாயத்திற்கு ஆளானேன்!!!
(மேலே உள்ள வாக்கியத்தின் நீளத்தை கணக்கில் கொண்டு, அதை கின்னஸ் ரெக்கார்டுக்கு யாராவது பரிந்துரைத்தால் தன்யனாவேன்!)

நண்பர்கள் மன்னிக்கவும் :)
I am the GREAT ESCAPE ;-)

கொஞ்ச நாளா, நிறைய சீரியஸ் பதிவுகள் எழுதித் தள்ளிட்டேன், அதான் ஒரு மாறுதலுக்கு! வ.வா.ச மெம்பர்கள் மட்டும் தான் 'உப்புமா' பதிவுகள் போட வேண்டுமா என்ன ????

இப்பதிவுக்கு நீங்கள் தரவல்ல சாம்பிள் பின்னூட்டங்கள் (ஏதாவது ஒன்றை கட் அண்ட் பேஸ்ட் செய்தாலே போதும், அல்லது நீங்கள் நினைக்கும் பின்னூட்ட நம்பரை, பின்னூட்டத்தில் இட்டாலே போதும் :))

1. யோவ் ...
2. இதெல்லாம் ரொம்பவே டூ மச்!
3. குசும்புய்யா ஒமக்கு!
4. லூஸாப்பா நீர் ?
5. :)))))))))))))))
6. நான் ஏமாறவில்லை !
7. சூப்பர், தல !
8. பலே, பேஷ், ரொம்ப நல்லாருக்கு !
9. ஏன்யா இப்டி அழிச்சாட்டியம் பண்றீர் ?
10. ஒம்ம தலையிலே இடி விழ :)
11. நக்கல் பிடிச்ச பாலா ஒழிக!
12. நகைச்சுவை மன்னர் பாலா வாழ்க!

தலைமறைவாகி விட்ட
எ.அ.பாலா

*** 340 ***

339. Corporate Cartoons!

338. நேர்மைக்கு விலையாக உயிர் கொடுத்த ராணுவ மேஜர்

ராணுவத்தில் சேர்ந்து பணி புரிய வேண்டும் என்ற தன் கனவை, பட்டப்படிப்பை முடிப்பதற்கு முன்னமே, ராணுவ ஆபிஸர் பயிற்சிக்கான தேர்வில் கலந்து கொண்டு வெற்றி பெற்று, நனவாக்கிக் கொண்டவர், சென்னையைச் சேர்ந்த ரவி சங்கர். 1988-இல், சிக்கிம் மாநிலத்தில், ராணுவ லெப்டினண்டாக பொறுப்பேற்றவர், கார்கில் யுத்தத்திலும் பங்காற்றியவர். பின்னர், மேஜராக பதவி உயர்வு பெற்று, 2003-இல் மதுராவில் உள்ள AERN ரெஜிமெண்ட்டுக்கு மாற்றலானார்.

அங்கு போய்ச் சேர்ந்த 2 மாதங்களுக்குப் பின், தன் தந்தையுடன் தொலைபேசிய ரவி, அந்த ரெஜிமெண்டில் நடைபெற்று வரும் தில்லுமுல்லுகள், ஊழல் குறித்து அவரிடம் சொல்லி மிகவும் வருத்தப்பட்டதாகத் தெரிகிறது. 2003, ஆகஸ்ட் 22 அன்று, வெளியில் சென்றவர், வீடு திரும்பவில்லை. ரவியைக் காணவில்லை என்று அன்றிரவே, அவரது மனைவி வீணா, ராணுவ அலுவலகத்தைத் தொடர்பு கொண்டு, புகார் தந்துள்ளார். புகாரும் பதிவு செய்யப்படவில்லை, எந்த நடவடிக்கையும் எடுக்கப்படவில்லை! மேஜர் ரவி, அடுத்த பத்து நாட்களில், லெப்டினண்ட் கர்னலாக பதவி உயர்வு பெறும் தறுவாயில் இருந்தார் என்பது இங்கே குறிப்பிடத்தக்கது.

23-ஆம் தேதியும் FIR பதிவு செய்யப்படவில்லை. இறுதியாக, ஆகஸ்ட் 24 அன்று, FIR பதிவு செய்ய ராணுவ அலுவலகம் ஒப்புக் கொண்டது! மேஜர் ரவி இறந்து விட்டதாகவும், ரயில்வே தண்டவாளத்தின் அருகிலிருந்து கண்டெடுக்கப்பட்ட அவரது உடல் அடையாளம் தெரியாத நிலையில் 23-ஆம் தேதி மாலையே எரிக்கப்பட்டு விட்டதாகவும், வீணாவுக்குப் பின்னர் தகவல் அளிக்கப்பட்டுள்ளது. விஷயத்தைக் கேள்விப்பட்ட ரவியின் வயதான பெற்றோரும் மனமுடைந்து போயினர். "அடையாளம் தெரியாத" என்ற விஷயமே சந்தேகத்திற்குரியது. ரவி எப்போது, தனது ஐ.டி. கார்டையும், பர்ஸையும் எடுத்துச் செல்வது வழக்கம் என்று அவர் தந்தையார் வாசு கூறுகிறார்.

"FIR ஏன் 24-ஆம் தேதி வரை ரெஜிஸ்டர் செய்யப்படவில்லை ? எதற்கு அவசர அவசரமாக உடலை எரிக்க வேண்டும் ? ரவியின் (வாட்ச், பர்ஸ், ஐ.டி.கார்ட்) போன்ற உடைமைகள் என்ன ஆயின? " போன்ற ரவியின் தந்தை கேட்ட சங்கடம் தரும் கேள்விகளுக்கு, ரவியின் மேலதிகாரியிடம் பதில் எதுவும் இல்லை!

"என் மகனுக்கு அங்கு நடக்கும் ஊழல் பற்றிய விவரம் தெரிந்து போனதால், அதை அவன் வெளியில் சொல்வதற்கு முன் அவனை தீர்த்துக் கட்டி விட்டார்கள் என்று நினைக்கிறேன். அவன் உடல் இரு துண்டுகளாக வெட்டப்பட்டு, தண்டவாளத்தில் போடப்பட்டு, யாரும் பார்ப்பதற்கு முன் எரிக்கப்பட்டு விட்டது!" என்று வாசு கூறுகிறார்.

ராணுவத்தின் முதல் விசாரணையில், ரவி ரயிலில் அடிபட்டு இறந்து போய் விட்டதாகக் கூறப்பட்டதை வாசு ஏற்கவில்லை. ராணுவத் தலைவரான ஜெனரல் விஜ் அவர்களுக்கு, வாசு தன் சந்தேகங்களை விளக்கி இரு முறை கடிதம் எழுதியும் ஒன்றும் நடக்காமல், பின் பத்திரிகைகளுக்கு விஷயத்தைச் சொன்னவுடன், விஜ் இரண்டாவது விசாரணைக்கு உத்தரவிட்டார். அது சென்னையில் நடந்தது.

இரண்டாவது "போலி" விசாரணை, ரவி தற்கொலை செய்து கொண்டு இறந்ததாகத் தெரிவித்தது ! அதாவது, முதல் விசாரணையின் விபத்து, தற்கொலை ஆனது!!! "தற்கொலை என்று கூறினால், எங்கள் குடும்பம் வெட்கப்பட்டு வாயை மூடிக் கொள்ளும் என்று ராணுவத்தில் சிலர் எதிர்பார்த்தனர்" என்று வாசு கூறுகிறார்! 2005-இல் வந்த RTI act-இன் பலத்தால், ரவியின் மரணம் குறித்த பல ஆவணங்களை, சிரமப்பட்டு ராணுவத்திடமிருந்து வாசுவால் பெற முடிந்தது. அவற்றை வாசித்த பின், அவருக்கு இன்னும் பல (பதில் இல்லா) கேள்விகள் எழுந்துள்ளன!

"ராணுவம் நடத்திய 2 விசாரணைகளும் நியாயத்துக்கும், உண்மைக்கும் புறம்பானவை. எனவே, என் மகனின் சந்தேகத்துக்குரிய மரணம் குறித்து CBI விசாரணை நடத்த வேண்டும். என் மகனைக் கொன்றவர்கள் தண்டனை அனுபவிக்க வேண்டும், அதற்காக நான் இறக்கும் வரை போராடுவேன், என் மகன் ஏன்/எப்படி இறந்தான் என்பதைக் கண்டுபிடித்தால் தான், எனக்கும் என் மனைவிக்கும் சற்று மன அமைதி ஏற்படும். ஒரு அநாதைப் பிச்சைக்காரனின் உடலை எரிப்பது போல என் மகனை எரித்திருப்பதை நினைத்தால் என் மனது தாங்கவில்லை" என்று கூறும் (கடந்த 4 வருடங்களாக இப்பிரச்சினையின் தீர்வு வேண்டி போராடிக் கொண்டிருக்கும்) 76 வயதான வாசு அவர்களின் மன உறுதியையும், போராட்ட குணத்தையும் எவ்வளவு பாராட்டினாலும் தகும். CBI விசாரணைக்கு உத்தரவிடும்படி வேண்டுகோள் விடுத்து, வாசு (பாதுகாப்புத்துறை அமைச்சருக்கு) எழுதிய கடிதத்திற்கு இது வரை பதில் இல்லை!

இந்த விஷயம் இந்திய ராணுவத்திற்கு ஒரு பெரிய பிளாக் மார்க் என்பதென்னவோ நிஜம்! ரவியின் தந்தையின் இப்போராட்டத்திற்கு ஆதரவு தர விரும்புவோர், கீழே தரப்பட்டுள்ள சுட்டிக்குச் சென்று, உங்கள் ஆதரவை உடனே தெரிவியுங்கள்! ரவியின் மரணம் குறித்த உண்மைகள் வெளிவருவதற்கு நம்மாலான சிறிய பங்களிப்பு இது!

http://www.petitiononline.com/MajRS/petition.html

மேஜர் ரவியின் ஆன்மா சாந்தி அடையவும், அவரது பெற்றோர் மன அமைதி பெறவும் பிரார்த்தனையோடு

என்றென்றும் அன்புடன்
பாலா

*** 338 ***

337. திவ்ய மங்கள ஸ்வரூபம்

விநா வேங்கடேசம் நநாதோ நநாத
ஸதா வேங்கடேசம் ஸ்மராமி ஸ்மராமி
ஹரே வேங்கடேச ப்ரஸீத ப்ரஸீத
ப்ரியம் வேங்கடேச ப்ரயச்ச ப்ரயச்ச

336. அலெக்ஸாண்டரின் ஒரு கண்ணின் பார்வை மீண்டது

அன்பு நண்பர்களே,

எனது இந்தப் பதிவில் அலெக்ஸாண்டர் என்ற பெரியவரின் காடராக்ட் சிகிச்சைக்காக பொருளுதவி கேட்டு வேண்டுகோள் வைத்திருந்தேன். எனது அலுவலக நண்பர்களிடம் சேகரித்தும், மற்றும் என்னிடம் இருந்த மருத்துவ நிதியிலிருந்து கொஞ்சம் எடுத்தும், ரூ.8000-ஐ அவரது லேசர் சிகிச்சைக்காக, CHILD என்ற தொண்டு நிறுவனம் மூலம் வழங்கினேன்.

இன்று அலெக்ஸாண்டர் என்னிடம் தொலைபேசினார். வலது கண்ணில் லேசர் சிகிச்சை மூலம் காடராக்ட் அகற்றப்பட்டதாகவும், கண் பார்வை பெருமளவு மீண்டு விட்டதாகவும் சொன்னார், தன் நன்றியையும் தெரிவித்துக் கொண்டார். கேட்க மிகவும் மகிழ்ச்சியாக இருந்தது. நாம் செய்த உதவி பலனளிக்கும்போது தான், அதற்கு ஓர் அர்த்தம் ஏற்படுகிறது அல்லவா ?

இந்த மகிழ்ச்சியை பகிர்ந்து கொள்ளவே இப்பதிவு! அலெக்ஸாண்டரின் இடது கண்ணிலும் காடராக்ட் சிகிச்சை செய்ய வேண்டியுள்ளது. மருத்துவமனையில் அலெக்ஸாண்டரின் நிலைமை குறித்து எடுத்துக் கூறியதன் விளைவாக, முதலில் கேட்ட தொகையிலிருந்து (ரூ.22000) ஒரு 7000 ரூபாய் குறைக்க முடிந்தது. அதாவது, 15000 ருபாய்க்கு சிகிச்சை செய்ய மருத்துவமனை ஒப்புக் கொண்டுள்ளது.

அதில், கிட்டத்தட்ட 5000 ரூபாய் சேகரித்து விட்டேன். உங்களால் இயன்ற தொகையை (அது எவ்வளவு சிறியதாக இருப்பினும்) தந்து அந்த ஆதரவற்ற முதியவருக்கு உதவுமாறு உங்களை அன்புடன் வேண்டுகிறேன். என் (மற்றும் ராம்கியின்) வங்கிக் கணக்கு விவரங்களை, தனி மடலில், உதவ விரும்பும் நண்பர்களுக்கு தருகிறேன்.

balaji_ammu@yahoo.com என்ற மின்னஞ்சலுக்கு எழுதவும். விவரங்கள் தருகிறேன்.

நன்றி.

என்றென்றும் அன்புடன்
பாலா

*** 336 ***

பெரியார், சன் டிவி, Beheading et al ...

இன்றைக்கு வாசித்த செய்திகளிலிருந்து சில, உங்கள் பார்வைக்கு:

1. திருவரங்கத்தில் 4 மாதங்களுக்கு முன் நடந்த பெரியார் சிலை உடைப்பையும், அதன் தொடர்பான வன்முறையையும் தொடர்ந்து, நேற்று விஷமிகள் சிலர், திருவாரூரில் உள்ள முத்துப்பேட்டையில் உள்ள பெரியார் சிலைக்கு அவமரியாதை செய்துள்ளதாகத் தெரிகிறது. அசம்பாவிதம் எதும் நடக்காமல் இருக்க, அங்கு போலீசார் குவிக்கப்பட்டுள்ளனர். சிலைக்கு முன் திராவிடர் கழக / மதிமுக தொண்டர்கள் ஆர்ப்பாட்டம் செய்து தங்கள் எதிர்ப்பைத் தெரிவித்துள்ளனர். அதன் தொடர்ச்சியாக, மீரான் ஹ¤சைன், மனோகரன் என்று இருவரை போலீசார் கைது செய்திருப்பதாகத் தெரிகிறது.

இது இப்படி இருக்க, திராவிடர் கழகத்தைச் சேர்ந்த தொ(கு)ண்டர்கள் இருவர், தஞ்சையிலுள்ள, பிரசித்தி பெற்ற பெருவுடையார் (பெரிய) கோயிலுக்குச் சென்று, அங்கிருந்த அர்ச்சகரை அடித்து உதைத்து அவரது பூணூலை அறுத்து எறிந்ததாக போலீஸ் கூறினர். அர்ச்சகரின் புகாரைத் தொடர்ந்து அவர்கள் இருவரும் கைது செய்யப்பட்டுள்ளனர். பழி ஓரிடம், பாவம் ஓரிடம் என்பதற்கு இதுவே சான்று!!! இந்த சிலை அவமரியாதையின் எதிரொலி திருவரங்கத்திலும் கேட்டது. அங்கு, சில தி.க. தொண்டர்கள் சாலை மறியலில் ஈடுபட்டதாகத் தெரிகிறது.

2. கடந்த டிசம்பர் மாதம், சன் டிவி இரண்டு உயர் ரக விமானங்களை இறக்குமதி செய்ய அரசிடம் மனு செய்திருந்தது. அவை bombardier challenger வகையைச் சார்ந்த விமானங்கள். விலை 236 கோடி ரூபாய்! அப்ளை செய்த ஒரு மாதத்திற்குள், அந்நிய வணிகத் துறை சன் டிவிக்கு இறக்குமதி லைசன்ஸ் வழங்கி விட்டதில் ஆச்சரியம் எதும் இல்லை என்றாலும், இந்த மேட்டர் சன் டிவி லாபத்தில் கொழிக்கிறது என்பதை சுட்டிக் காட்டுகிறது. அந்த இரண்டு விமானங்களும் பயணிகள் விமானங்கள் அல்ல, அவை பிசினஸ் ஜெட் வகையைச் சார்ந்தவை. இந்தியாவில் உள்ள எந்த கட்சியும், தனது தலைவர்களின் உபயோகத்திற்கு இவ்வளவு விலை உயர்ந்த விமானங்களை வாங்குவதை நினைத்துப் பார்க்க முடியாது என்று தோன்றுகிறது.

3. ஒரு 12 வயது சிறுவன், கையில் கத்தியை ஏந்திய வண்ணம், தன் முன் கிடக்கும் (கண்கள் கட்டப்பட்ட) மனிதனை, 'அமெரிக்கக் கைக்கூலி' என்று உரத்த குரலில் கண்டனம் செய்து விட்டு, 'கடவுள் மிகப் பெரியவர்' என்ற கோஷத்துக்கிடையே, அந்த மனிதனின் தலையைக் கொய்து, கொய்த தலையை முடியைப் பிடித்து தூக்கி வெற்றி முழக்கமிடுகிறான்.

மேற்கூறியதை காட்டும் வீடியோ படமொன்று, பாகிஸ்தானில் தற்சமயம் உலா வருகிறது. இந்த அநியாய வன்முறையில் உயிரிழந்த குலாம் நபி, தலிபானுக்கு ஏதோ வகையில் துரோகம் செய்ததாகத் தெரிகிறது. கொல்லப்படுவதற்கு முன், தலிபான் அரக்கர்கள் (வாக்குமூலம் மூலம்) குலாம் நபியை தான் ஒரு துரோகி என்று ஒப்புக் கொள்ள வைத்துள்ளனர்.

குலாம் நபியை வதம் செய்த அந்த (ராணுவச் சீருடை அணிந்த) கொலைகாரக் குழந்தை, "இவன் ஒரு அமெரிக்க ஒற்றன். இவனைப் போன்றவர்களுக்கு இது தான் முடிவு" என்று வீடியோவில் கூறுகிறது. சிறுவர்களை தீவிரவாதிகளாக மாற்றும் தலிபான் என்ற இரக்கமற்ற அரக்க இயக்கத்தை, முழுவதுமாக ஒழிக்காவிட்டால், ஆப்கானிஸ்தானுக்கு உய்வு என்பது கிடையாது.

இதற்கெல்லாம் மூல காரணம் அமெரிக்கா என்பதும் தெளிவு. ஆப்கானிஸ்தானும், இராக்கும், பிணக்காடாக மாறியதற்கு, அமெரிக்க எதேச்சதிகாரம் ஒரு முக்கியக் காரணம் என்பதை யாரும் மறுக்க இயலாது.

என்றென்றும் அன்புடன்
பாலா

*** 335 ***

334. அலெக்ஸாண்டரின் கண் பார்வைக்கு உதவி வேண்டி

அன்பு நண்பர்களே,

இப்பதிவை சிரமம் பார்க்காமல், முழுவதும் வாசித்து விடுமாறு ஒரு விண்ணப்பத்துடன்,

இரு தினங்களுக்கு முன், மெயில் வழி, ஒரு ஆதரவற்ற முதியவரின் காடராக்ட் அறுவை சிகிச்சைக்கு பொருளுதவி வேண்டி ஒரு விண்ணப்பம் வந்தது. அந்த மடலின் சாராம்சம் இது தான்!

அலெக்ஸாண்டர் என்ற 69 வயது பெரியவர் ஒரு முதியவர்களுக்கான இல்லத்தில் முதலில் வாழ்ந்து வந்தார். அவருக்கென்று உறவினர் யாரும் இல்லாத சூழலில், அந்த இல்லம் மூடப்பட்டு, பெங்களூருக்கு இடம் பெயர்ந்ததால், அவருக்கு bronchitis நோய் இருப்பதால், பெங்களூர் செல்ல முடியவில்லை. சென்னையிலேயே, அவரது நண்பர் ஒருவர் வீட்டில் தங்கி, ஆங்கில டியூஷன் எடுத்து, வெளியில் சாப்பிட்டு, கஷ்ட ஜீவனம் நடத்தி வருவதாக, அவர் கூற கேட்டறிந்தேன்.

அவரது இரு கண்களிலும் காடராக்ட் ஏற்பட்டு, பார்வை மங்கி வருகிறது. CHILD என்னும் சமூக சேவை நிறுவனம், அவரது அறுவை சிகிச்சைக்கான நிதி உதவியை சேகரிக்கும் பொறுப்பை ஏற்றிருக்கிறது. அதை செந்தில் என்பவர் நடத்தி வருகிறார்.

செந்தில், CHILD பற்றி:
----------------------------------
இவருடன் பேசினேன். இவர் KMC-யில் HIV கவுன்சிலராக பணியாற்றிக் கொண்டே, இந்த சேவை அமைப்பையும் நடத்தி வருகிறார். கிடைக்கும் பொருளுதவி போதாமல், தனது சம்பளத்தின் பெரும்பகுதியையும், கொரட்டூரில் உள்ள CHILD இல்லத்தில் பராமரிக்கப்பட்டு வரும் 9 (HIV-யால் பாதிக்கப்பட்ட) குழந்தைகளுக்காக செலவழித்து வருகிறார். சமூக சேவையை வெளியில் சொல்லாமல் செய்து வரும் செந்தில் மிக்க பாராட்டுக்குரியவர்! கொரட்டூரில் உள்ள இல்லத்துக்கு வந்து குழந்தைகளை சந்திக்குமாறு எனக்கு அழைப்பு விடுத்தார். நான் ஒரு முறை அங்கு சென்று வந்து, விரிவாக எழுதுகிறேன்.

இவரைப் போன்றவர்கள் சோர்வடையாமல் சேவை செய்ய உதவ வேண்டியது நமது கடமை என்று தோன்றுகிறது. அவரது கைத் தொலைபேசி எண் மற்றும் CHILD-இன் வங்கிக் கணக்கு எண்ணை தருகிறேன். நேரடியாக நீங்கள் அவருடன் பேசலாம், உதவலாம்! ரெ·பரன்ஸ¤க்கு என் பெயரை (பாலாஜி, எ.அ.பாலா அல்ல!) கூறுங்கள்.

Mobile No.: 98416-56103
Account Name: CHILD
ICICI SB A/C No.: 602001321353
Branch: Chennai Main branch

இப்போது அலெக்ஸாண்டருக்கு வருகிறேன். என், எனது அலுவல நண்பர்கள் வாயிலாக ஒரு 5000 ரூபாய் சேகரிக்க முடிந்தது. அத்துடன், லோகபிரியா என்னும் குழந்தையின் மருத்துவ உதவிக்கென்று நான் முன்னர் சேகரித்த தொகையில் உள்ள மீதியில் ரூ.3000 சேர்த்து, ரூ.8000-ஐ, அலெக்ஸாண்டரின் கண் அறுவை சிகிச்சைக்காக, செந்தில் அவர்களுக்கு இன்று அனுப்பினேன். தேவைப்பட்டால், முன்னர் பணம் அனுப்பிய நல்ல உள்ளங்களின் சம்மதத்தோடு, மீதித் தொகையிலிருந்து இன்னும் கொஞ்சம் பணம் அனுப்பலாம் என்று உத்தேசம்.

இரு கண்களுக்கும் சர்ஜரி செய்ய மொத்தம் 40000 ரூபாய் தேவைப்படுகிறது. இன்னும் கிட்டத்தட்ட 26000 ரூபாய் சேகரிக்க வேண்டியுள்ளது. உதவ விருப்பம் உள்ள நண்பர்கள் நேரடியாக செந்திலின் CHILD வங்கிக் கணக்குக்கு பணம் அனுப்பலாம். அனுப்பியவுடன் எனக்கு மெயில் வழி (balaji_ammu@yahoo.com) விவரங்களை (பெயர், அனுப்பிய தேதி, தொகை, transaction reference no. ...) அனுப்பினால், தொகை credit ஆனவுடன் உங்களுக்கு தகவல் தரவும், கணக்கு வழக்கு பார்க்கவும், வசதியாக இருக்கும். என் வங்கிக் கணக்குக்கு அனுப்பினாலும் பரவாயில்லை. நான் செந்திலிடம் பணத்தைச் சேர்ப்பித்து விடுகிறேன். என் வங்கிக் கணக்கு விவரங்களை, தனி மடலில், வேண்டும் நண்பர்களுக்கு தருகிறேன்.

Related Link

என்றென்றும் அன்புடன்
பாலா


*** 334 ***

Father of the Ration ;-)

காங்கிரஸ் கட்சி தமிழக சட்டசபையில் அடிக்கும் கூத்து எல்லை மீறிப் போய் விட்டதாகத் தெரிகிறது.  முதல்வர் கருணாநிதியே வெட்கிப் போகும் அளவுக்கு, அவருக்கு புகழாரம் சூட்டி, தமிழக காங்கிரஸ் சட்டமன்ற உறுப்பினர்கள் மகிழ்வதற்கானக் காரணமும் புரியவில்லை.  மேடம் சோனியாவின் உத்தரவாகக் கூட இருக்கலாம், யார் கண்டது??

காங்கிரஸ் சட்டமன்ற கட்சியின் துணைத் தலைவரான D யசோதா, நேற்று சட்டசபையில் ஒரு தமாஷ் பண்ணினார்.  அதாவது, "மகாத்மா காந்தியை Father of the Nation (தேசப்பிதா) என்று போற்றுவது போல, கருணாநிதி அவர்களை Father of the Ration (நியாய விலைக் கடைகளின் தந்தை ;)) என்று அழைப்பது சாலப் பொருந்தும்" என்று ஒரே போடாகப் போட்டார் !!!

கருணாநிதி அவர்கள், ரேஷனில் 2 ரூபாய்க்கு (1 கிலோ) அரிசி கிடைக்கச் செய்ததோடு அல்லாமல், இன்ன பிற பருப்புகளும் சமையல் எண்ணெயும், மலிவான விலையில் கிடைக்கும்படி செய்ததற்காகவே, இந்த சூப்பர் 'குளிர்ச்சி' புகழாரம் யசோதாவால், அவருக்கு சூட்டப்பட்டது.

இன்னொரு, காங்கிரஸ் MLA தண்டபாணி அவர்கள்,  "திமுக அரசு செய்யும் நல்ல விஷயங்களை பாராட்டுவதை நீங்கள் 'ஜால்ரா' என்று கூறினால், அது குறித்து எனக்கு வெட்கமில்லை!  அந்த "ஜால்ரா" இனிமேல் இன்னும் சத்தமாக ஒலிக்கும்.  நீண்ட தூர ஓட்டத்தின்போது (marathon), ஓட்டத்தில் பங்கு பெறுபவர்களை பார்வையாளைகள் உற்சாகப்படுத்துவதை ஒத்தது நாங்கள் திமுக அரசை ஊக்கப்படுத்துவது" என்று நேரடியாகவே போட்டுத் தாக்கினார் :) 

எல்லாம் சரி தான்!  புகழ்ச்சிக்கும் ஒரு அளவு வேணும்!  யாரும் யாரையும், ஹீரோவும் ஆக்க வேண்டாம், அடுத்து சீரோவும் (zero) ஆக்க வேண்டாம்!

நாளைக்கே, யாராவது 'ஆட்சியில் பங்கு கேளுங்க'ன்னு உங்களை (காங்கிரஸ் சட்டமன்ற உறுப்பினர்கள்!) தூண்டி விட்டு, நீங்களும் பங்கு கேட்டு, 'எப்போதும் போல' நம்ம முதல்வர், 'அதெல்லாம் சரிப்பட்டு வராது'ன்னு சொன்னார்னா, நீங்க எல்லாரும் கடுப்பாகி, பெரியவரை தடாலடியா, "Father of the Fashion"ன்னு சொல்லி, காலை வாரி விட்டு விடுவீர்களே!  அதான் கொஞ்சம் பிராப்ளம் :)))

அப்படி பண்ணாம இருந்தா எல்லாம் OK தான்!  அந்த சமயத்துலே, வேற யாரையாவது, "Mother of the Ration"ன்னு சொல்லாமல் இருந்தா சரி தான் ;-)))

என்றென்றும் அன்புடன்
பாலா

நன்றி: இந்தியன் எக்ஸ்பிரஸ்

*** 333 ***

332. திருக்குறுங்குடி - A Model Village

எனது திருக்குறுங்குடி கிராமமும் கைசிக நாட்டிய நாடகமும் என்ற பதிவின் தொடர்ச்சியாக, அந்த கிராமத்தில் செயல்படுத்தப்பட்டு வரும் மேம்பாட்டுத் திட்டங்கள் பற்றி இப்பதிவில் எழுதுகிறேன்.

திருக்குறுங்குடியை தத்து எடுத்துக் கொண்டுள்ள (TVS ஏற்படுத்தியுள்ள ) டிரஸ்ட் சாதிமத வேறுபாடின்றி, கிராமத்தினர் அனைவருக்கும் உதவி வருகிறது. கிராமம் பச்சை பசேலென்று செழிப்பாகக் காட்சியளிப்பது கண்ணைக் கவர்வதாய் உள்ளது. இக்கிராமத்திலேயே தங்கி, வளர்ச்சிப் பணியை மேற்பார்வையிட்டு வரும் பத்ரி என்பவர், திருக்குறுங்குடியை தத்து எடுப்பதற்கு முன் அங்குள்ள நிலைமை குறித்து ஓர் ஆய்வு நடத்தி, அதன் தொடர்ச்சியாக பொருளாதாரம், சுகாதாரம், கல்வி, தண்ணீர், சுற்றுச்சூழல் ஆகியவற்றின் மேம்பாட்டுக்கு திட்டங்கள் தீட்டி செயல்படுத்தி வருவதாகக் கூறினார்.
TVS டிரஸ்ட்டானது, கிராம சுய உதவிக் குழுக்களையும், இளைஞர் நற்பணி மன்றங்களையும் ஒருங்கிணைத்து செயல்படுவதால், கிராம வளர்ச்சிக்கு அனைவரும் ஒற்றுமையோடும், முனைப்போடும் தங்கள் பங்கை ஆற்றுகின்றனர். கிராமத்தில் உள்ள ஒவ்வொரு குடும்பமும், ஆண்டொன்றுக்கு குறைந்த பட்சம் 25000 ரூபாய் வருமானம் ஈட்ட வழி செய்வதை டிரஸ்ட் தனது முதன்மை இலக்காகக் கொண்டுள்ளது.

டிரஸ்ட்டின் முயற்சியால், பால் கூட்டுறவு மையங்கள் தொடங்கப்பட்டு, பால் உற்பத்தி பெருகி, ஆவின் போன்ற பெரு நிறுவனங்களுக்கு பாலை நேரடியாக விற்று, அதிக லாபம் பெற வழி வகுக்கப்பட்டுள்ளது. தற்போது "வெர்மி கம்போஸ்டிங்" (Vermi Composting) சிறு தொழிலும் நல்ல லாபம் தரும் ஒன்றாக மாறி வருவதை பார்க்க முடிகிறது.

கிராமத்தில் 556 விவசாயக் குடும்பங்களும், 150 ஹெக்டேர் விளைநிலமும் உள்ளன. டிரஸ்ட் ஆனது, தமிழ்நாடு விவசாய பல்கலைக்கழகத்தின் துணையோடு, விவசாயிகள் நல்ல விதைகளை பயன்படுத்தவும், தங்கள் அணுகுமுறையில் (விளைச்சல் பெருகுவதற்கு) மாற்றங்களை கை கொள்ளவும் வைத்துள்ளது. அதன் பயனாக, முன்னர் மாநில சராசரி அளவு விளைச்சலை விட குறைவாக இருந்த (நெல் மற்றும் வாழையின்) விளைச்சல், தற்போது பல படங்கு பெருகியுள்ளது குறிப்பிடத் தக்கது.

டிரஸ்ட் ஆனது, திருக்குறுங்குடி அருகே உள்ள இன்னும் 10 கிராமங்களை சமீபத்தில் தத்தெடுத்துள்ளது. திருக்குறுங்குடியில் கணினி மையங்களும், டிரஸ்ட்டின் உதவியோடு அமைக்கப்பட்டு, கிராமத்து மாணவ மாணவிகள் ஆர்வமாகக் கற்று வருகின்றனர்.

இறுதியாக ஒரு சிந்தனை: இந்தியாவில் மொத்தம் 6,38,365 கிராமங்கள் உள்ளன. திருக்குறுங்குடிக்கு TVS டிரஸ்ட உதவுவது போல, அம்பானி, ஜிந்தல், முருகப்பா, ITC போன்ற பெரு நிறுவனங்களும், சில பல கிராமங்களின் மேம்பாட்டுக்காக, டிரஸ்ட்கள் அமைத்து உதவி செய்து வந்தாலும், மத்திய / மாநில அரசுகளின் சீரிய திட்டங்கள் / உதவி இல்லாமல், இந்திய கிராம மேம்பாடு முழுதாக சாத்தியமில்லை என்பது நிதர்சனம்!

என்றென்றும் அன்புடன்
பாலா

*** 332 ***

331. விசித்திர திகில் அனுபவங்கள் (அ) சம்பவங்கள் - தொடர் சங்கிலி

தேசிகனின் இந்தப் பதிவை வாசித்தவுடன், என் ஞாபகத்தில் பளீரிட்ட 1/3 டஜன் அனுபவங்களை (என்னுடையது அல்ல!) பகிர்ந்து கொள்கிறேன்.

1. அபிராமி, அபிராமி!

நான் பள்ளியில் படித்துக் கொண்டிருந்த காலகட்டத்தில் (எழுபதுகளில்), அபிராமி தியேட்டரில் (என்று நினைக்கிறேன்) லிசா என்ற மலையாளப் பேய்ப்படம் திரையிடப்பட்டது. அப்போது நடைபெற்றதாகக் கூறப்படும் திகில் சம்பவம் (புரளியா என்று தெரியாது!) நன்றாக இன்னும் நினைவில் உள்ளது. அதைக் கூறி, இரவு வேளைகளில் பலரை பயமுறுத்தி இருக்கிறேன்.

அந்தப் படத்தை நைட்ஷோ பார்க்க சென்றிருந்த இரண்டு இளம் சகோதரர்களில் ஒருவருக்கு படம் ஓடிக் கொண்டிருந்தபோது அவசரமாக "அது" (படக்காட்சிகள் ஏற்படுத்திய கிலியில்) வர, டாய்லெட்டுக்கு ஓடினார். டாய்லெட்டில் யாரும் இல்லை. இயற்கை உபாதையை சரி செய்து கொண்டு, கை அலம்பும்போது, மேலேயிருந்து தலையில் ஏதோ சொட்டவே, மேலே பார்த்தவர், சப்தநாடியும் ஒடுங்கிப் போய் விட்டார். உத்திரத்தில் ஒரு பிளவிலிருந்து ஒரு மனிதக் கை, ரத்தம் சொட்ட, தொங்கிக் கொண்டிருந்தது.

பீதியான அவர், இருக்கைக்கு வந்து, தன் சகோதரரிடம் மேட்டரை ரகசியமாகக் கூறி, தனக்கு மிகவும் பயமாக இருப்பதாகவும், உடனே கிளம்ப வேண்டும் என்றும் கூறினார். "வா, அது என்னவென்று பார்த்து விட்டு, தியேட்டர் மேனேஜரிடம் கம்பிளெயிண்ட் பண்ணலாம்" என்று அடுத்தவர் கூறியதற்கு, "கை"யைப் பார்த்தவர், "அதெல்லாம் வேண்டாம், நம்மைக் குடைந்து விடுவார்கள், சீக்கிரம் போகலாம்" என்று அவரை இழுத்துக் கொண்டு வெளியே வந்தவரை பார்த்து, தியேட்டர் வாட்ச்மேன், " என்ன, தம்பிகளா, படம் பார்க்க பயமா இருக்கா, இந்த மாதிரி படத்துக்கெல்லாம் சின்னப்பசங்க நைட்ஷோ வரலாமா?" என்று விவரம் புரியாமல் கடுப்படித்தார்.

சாலை இருட்டாக இருந்தது. சாலை ஓரத்தில் ஒரு சைக்கிள் ரிக்ஷாவில் அதன் ஓட்டுனர் முக்காடு போட்டு தூங்கிக் கொண்டிருந்தார். அவரை எழுப்பி, "நாங்க எக்மோர் போகணும் வரீங்களா?" என்றவுடன் அவர் குளிருக்கு முண்டாசு கட்டிக் கொண்டு, போட்டிருந்த ஜிப்பாவை நன்றாக இழுத்து விட்டுக் கொண்டு, "போகலாங்க, ஒரு 10 ரூபாய் கொடுத்துடுங்க" என்றார்.

கொஞ்ச தூரம் ரிக்ஷா போனவுடன், ரிக்ஷாக்காரர் கரகரப்பான குரலில், "என்ன தம்பிகளா ? பாதிப் படத்துலேயே வந்துட்டீங்க போல தெரியுது, ஏதாவது சீன் பார்த்து பயந்துட்டீங்களா?" என்று கேட்கவே, இளவயசுக்காரர், தான் டாய்லெட்டில் பார்த்ததை விலாவாரியாகக் கூறியவுடன், திரும்பிய ரிக்ஷாக்காரர், "இந்தக் கையா, பாருங்க?" என்று ஜிப்பாவிலிருந்து தன் இடது கையை உருவிக் காட்டினார், ரத்தம் தோய்ந்த டாய்லெட்டில் பார்த்த அந்தக் கை போலவே! ரிக்ஷாக்காரருக்கு, முகம் இருக்க வேண்டிய இடத்தில், ஒரு கருப்பு வட்டம் மட்டுமே இருந்தது!!!!

குலை நடுங்கிப் போன சகோதரர்களில் ஒருவர், ஸ்பாட்டிலேயே அவுட்! இந்த சம்பவம் உண்மையிலே நடந்ததா என்றெல்லாம் நான் இதுவரை செக் பண்ணவில்லை!

2. லாலி ரோட் to GCT

கல்லூரியில் படித்த காலத்தில், இரண்டு அம்மாஞ்சிகள் (சந்திரசேகர், பத்து என்ற பத்மநாபன்) என் கூடப் படித்தார்கள். அவர்களுக்கு ஏற்பட்ட திகில் அனுபவம் இது. செவ்வாய் கிழமைகளில் ஹாஸ்டல் மெஸ்ஸில் ghee rice என்ற வாசனை (நாற்றம்!) மிக்க உணவு ஒன்றை டின்னருக்கு வழங்குவார்கள். சந்திராவுக்கும், பத்துவுக்கும் அது ஆகவே ஆகாது. அன்று, இருவரும், ரத்ன விநாயகர் கோயிலுக்கு அருகே உள்ள அன்னபூர்ணா சென்று ஒரு வெட்டு வெட்டி விட்டு (Dutch முறை தான்!) காலாற ஆர்.எஸ்.புரத்திலிருந்து நடந்து வருவார்கள்.

லாலி ரோடு ஜங்ஷன் என்ற நாற்சாலை சந்திப்பிலிருந்து (ஒரு பக்கம் போனால் GCT, இன்னொரு பக்கம் போனால் மருதமலை) GCT கல்லூரி வரை செல்லும் சாலையில், தெரு விளக்குகள் இல்லாததால், மரங்கள் அடர்ந்து இரவு வேளைகளில் இருட்டாக இருக்கும். ஒரு சமயம், இரவு மணி பத்து இருக்கும். அன்னபூர்ணாவில் டின்னர் முடித்து விட்டு, பயத்தைப் போக்க கந்தசஷ்டி கவசம் சொல்லிக் கொண்டே, இருவரும் 'லாலி ரோடு to GCT' நடந்து வந்து கொண்டிருந்தனர்.

அப்போது, பின்னால் ஏதோ ஆளரவம் கேட்டது. அமாவாசையால் கும்மிருட்டு வேறு. பத்து, "யாரது?" என்று வினவ, ஒரு கிழவியின் குரல், "தம்பிகளா, நான் ஸ்ரீவள்ளி டாக்கீஸ் கிட்ட போகணும், கொஞ்சம் வழி சொல்லுவீங்களா?" என்றவுடன், பயம் தெளிந்த பத்து, "பாட்டி, இப்டியே நேரா, காலேஜ தாண்டிப் போனா, ஒரு டீக்கடை வரும். அங்க கேட்டா சொல்லுவாங்க" என்று கூறி விட்டு இருவரும் நடக்க மீண்டும் ஆரம்பித்தார்கள்.

பின்னாடியே கிழவியும் நடந்து வந்து கொண்டிருந்தாள்! சந்திராவுக்கு ஏதோ பொறி தட்ட(!), மிக வேகமாக நடக்கத் தொடங்கினான், பத்துவும் தான்! பின்னால் கிழவியும் மிக வேகமாக நடந்து வரும் அரவம் கேட்டபடி இருந்தது. இருவரும் பீதியடைந்து, முதலில் மெதுவாக பின்னர் வேகமாக ஓட ஆரம்பிக்க, பின்னால், கிழவியும் ஓடி வரும் அரவம் தொடர்ந்தது!!! தலை தெறிக்க ஓடிய இருவரும், கல்லூரி கேட் அருகில் இருந்த வெளிச்ச பிரவாகத்திற்கு வந்து, திரும்பிப் பார்க்க, பின்னால் யாரும் இல்லை!

இருவருக்கும் அடுத்த 2 நாட்கள் கடுமையான காய்ச்சல், கிளாஸ¤க்கு வரவில்லை. இந்த திகில் கதையை, பார்க்க வந்த எல்லாரிடமும் மாய்ந்து மாய்ந்து சொல்லி, நல்ல பிரபலம் அடைந்தனர் :)

3. தள்ளாதே! என்னைத் தள்ளாதே!

கல்லூரி நண்பன் ஷியாம் சுந்தர், கல்லூரி கிரிக்கெட் டீமின் கேப்டன், தைரியமானவனும் கூட! நாங்கள் தங்கி இருந்த விடுதியின் தரைத்தளத்தில் இருந்த இடது பக்க டாய்லெட் அறை ஒன்றில் பல வருடங்களுக்கு முன் மாணவர் ஒருவர் தற்கொலை செய்து கொண்டு இறந்ததாக ஒரு விஷயம் கேள்விப்பட்டதால், இரவு நேரத்தில், யாரும் அங்கு செல்ல மாட்டார்கள். விளக்கு வேறு கிடையாது.

ஷியாமின் அறை தரைத்தளத்தில் தான் இருந்தது. ஒரு நாள் காலை இரண்டு மணி வரை, engineering drawing போட்டு விட்டு, படுப்பதற்கு முன் சிறுநீர் கழிக்க (தூக்கக் கலக்கத்தில் மறந்து போய்) 'அந்த' டாய்லெட்டுக்கு செல்ல முற்பட்டான். உள்ளே நுழைந்தவனை யாரோ தள்ளி விட்ட மாதிரி இருந்தது. 'யாரோ வேண்டுமென்றே தள்ளி விடுகிறார்கள்' என்று எண்ணிய ஷியாம், "ஏய், தூக்கம் வருது, வெளயாடாதே" என்று சொல்லிக் கொண்டே, மீண்டும் உள்ளே நிழைய எத்தனித்தான், மீண்டும் ஒரு தள்ளு! கடுப்பான ஷியாம், "செருப்படி வாங்கப் போற" என்று கத்தியபடி, வேகமாக டாய்லெட்டில் நிழைய முற்பட, 'யாரோ' இன்னும் வேகமாக ஷியாமை தள்ளி விட, ஷியாம் டாய்லெட்டுக்கு வெளியே வந்து விழுந்தான்!!!

இப்போது ஷியாமின் சகலமும் விழித்துக் கொள்ள, தனது அறைக்கு ஓடிய ஷியாம், ஒரு 2 நாட்கள் எந்த டாய்லெட்டுக்கும் போகவில்லை என்றால் பார்த்துக் கொள்ளுங்களேன் :) மாவீரன் ஷியாமையே கதி கலங்க வைத்த "அது" குறித்த பேச்சு, கேம்பஸில் ரொம்ப நாட்கள் ஓடியது!!!

4. சொற்களில் சிக்காத பற்கள்!

என் கல்லூரி நண்பன் நாராயணன் (இவனது கீர்த்தி சிறியது, மூர்த்தி பெரியது, படிப்பு, விளையாட்டு, பேச்சுப்போட்டி என்று அனைத்திலும் கலக்குவான்!) தன் பங்குக்கு ஒரு "திகில்" கதை கூறினான். ஒரு சமயம், அவனது நண்பர்கள் இருவர், கோயமுத்தூரில் உள்ள பழைய ஸ்ரீநிவாஸா டாக்கீஸில், நைட் ஷோ பார்த்து விட்டு திரும்பிய போது, இருட்டான சாலையோரத்தில் (இரவு 2 மணிக்கு) ஒருவர் வேர்க்கடலை வறுத்துக் கொண்டிருந்தார்! நண்பன் ஒருவனுக்கு கடலை கொறிக்க ஆசை வரவே, வண்டி அருகில் சென்று, "ஒரு ரூபாய்க்கு கடலை கொடுங்க" என்று வாஞ்சையோடு வாணலியைப் பார்த்தவனுக்கு இதயமே நின்று விட்டது! வாணலியில் மணலோடு வறுக்கப்பட்டுக் கொண்டிருந்தவை மனிதப் பற்கள்!! அப்புறமும் நம் மக்கள் அங்கு நிற்பார்களா, எடுத்தார்கள் ஓட்டம், பின்னங்கால் பிடறியில் பட :)

Epilogue:
------------
நானும் என் பங்குக்கு "திகில்" அனுபவம் பெற, தைரியசாலி வேடமிட்டுக் கொண்டு, தன்னந்தனியாக வாடகை சைக்கிள் மிதித்துக் கொண்டு, கல்லூரிக்கு அருகே இருந்த முத்து டாக்கீஸ¤க்கும், சென்ட்ரல் தியேட்டருக்கும், பல முறை நைட் ஷோக்கள் சென்று வந்துள்ளேன்! படம் பார்த்து விட்டு, அகாலமான நேரத்தில் திரும்பி வரும்போது, சாலையோர முருங்கை மரங்களில் வேதாளமோ, புளிய மரங்களில் பேயோ/பிசாசோ தொங்குவதை ஒரு முறையேனும் பார்த்து விட்டால், நம் ஜென்மமும் 'திகில்' சாபல்யம் அடையுமே என்று ஏங்கி பரிதவித்தது தான் மிச்சம்!!! நைட் ஷோக்கள் போனதில், தூக்கமும் போச்சு, அந்த செமஸ்டரில் மார்க்கும் போச்சு :) நமக்கெல்லாம் எதுக்கும் கொடுப்பினை கிடையாதுங்க :))))

தங்கள் (அல்லது) தாங்கள் கேள்விப்பட்ட "திகில் அனுபவங்களை" பகிர்ந்து கொள்ள நான் அழைக்க விரும்பும் நண்பர்கள்:

1. தேசிகன்
2. பினாத்தல் சுரேஷ்
3. டோண்டு ராகவன்
4. ஹாய் கோபி
5. நாமக்கல் சிபி
6. உஷா ராமச்சந்திரன்

என்றென்றும் அன்புடன்
பாலா

*** 331 ***

Lasith Malinga - Srilankan Lion that roared

WC 2007 - இலங்கை vs தென்னாபிரிக்கா

முதலில் பேட் செய்த இலங்கை அணி தொடக்கத்திலேயே தரங்காவை இழந்தது, ஸ்கோர் 13/1. துல்லியமாக பந்து வீசும் போலாக்கிற்கு, அவரது துல்லியேமே எதிரியானது! அவர் பந்து வீசும் முறை predictable ஆக இருப்பதாலும், இப்போது வேகமும் குறைந்து விட்டதாலும், ஜெயசூர்யாவின் ·பேவரட் பந்து வீச்சாளர் ஆனார். நான்கு பவுண்டரிகள் அடித்ததில், போலாக் 4 ஓவர்களில் கொடுத்தது, 32 ரன்கள்.

ஜெயசூர்யாவின் ரூபத்தில் வந்த ஆபத்து, லாங்கெவெல்ட்டின் பந்தில் விலகியது. ஜெயசூர்யா அவுட்! ஸ்கோர் 45/2.

ஜயவர்த்தனாவும் ஸ்கோர் 65 ரன்கள் இருந்தபோது, விக்கெட்டை இழந்தார். நன்றாக ஆடிக் கொண்டிருந்த சங்கக்காராவும், சமரசில்வாவும், அடுத்தடுத்து விக்கெட்டை பறிகொடுக்க ஸ்கோர் 98-5, 24.1 ஓவர்களில். சமரசில்வாவை கிப்ஸ், ஸ்டம்ப் மேல் பாய்ந்து ரன் அவுட் செய்த காட்சி, கண்ணிலேயே நிற்கிறது. அடுத்து ஒரு நல்ல பார்ட்னர்ஷிப் (97 ரன்கள்), தில்ஷனுக்கும் ஆர்னால்டுக்கும் இடையே மலர்ந்தது. இருவருமே அரை சதம் அடித்தனர்.

இன்னிங்க்ஸின் இறுதியில், 1 ரன்னில் 4 விக்கெட்டுகள் கும்பலாக விழ, இலங்கை 49.3 ஒவர்களில், 209 ரன்கள் மட்டுமே எடுத்து ஆட்டமிழந்தது! தென்னாபிரிக்காவின் அன்றைய நட்சத்திர பந்து வீச்சாளர் லாங்கவெல்ட், 10-1-39-5

தொடர்ந்து பேட் செய்த தென்னாப்பிரிகா, டிவிலியர்ஸை சாமிந்தாவின் முதல் ஓவரிலேயே (clean bowled) இழந்தது. வாஸ் அற்புதமாக பொறி வைத்து இந்த விக்கெட்டை, இன்னிங்க்ஸின் முதல் ஓவரின் ஆறாவது பந்தில் பறித்தெடுத்தார்!!! ஒரு கட்டத்தில், வாஸின் bowling figures, 6-0-9-1. அவர் பந்து வீச்சை சமாளிக்க ஸ்மித் பயங்கரமாகத் தடுமாறியதை பார்க்க முடிந்தது. போகப் போக, ஸ்மித் தைரியமாக அடித்து ஆடினார்.

ஸ்மித்தும், காலிஸ¤ம் ஜோடி சேர்ந்து, ஸ்கோர் 95 ரன்கள் (17.2 ஓவர்கள்) வரும் வரை, கவனமாக ஆடினர். முரளியின் பந்து வீச்சில், 18வது ஓவரில், staumped அவுட் ஆனார். ஸ்மித் எடுத்த ரன்கள் 59. ஸ்மித்தும் காலிஸ¤ம், மற்ற பேட்ஸ்மன்களுக்கு, நல்ல ஓர் அடித்தளத்தை அமைத்துக் கொடுத்தனர் என்றால் அது மிகையாகாது.

25வது ஓவரின் முடிவில், தென்னாபிரிக்கா ஸ்கோர் 134/2, எட்டு விக்கெட்டுகள் கையில் இருந்த நிலையில், வேண்டிய ரன் ரேட் 3.04 மட்டுமே, இலங்கை அணி தோல்வியை எதிர் நோக்கியே பந்து வீசிக் கொண்டிருந்தது என்று கூறலாம்! ஸ்கோர் 160 என்ற நிலையில், முரளியின் பந்து வீச்சில், கிப்ஸ் மற்றும் பவுச்சர் தொடர்ந்து அவுட் ஆக, ஸ்கோர் 160-4, இலங்கைக்கு சற்று புத்துயிர் பெற்றது! முரளி எடுத்த caught and bowled விக்கெட் (கிப்ஸ்) அற்புதம்!

ஜெயசூரியாவும் அடுத்த பக்கத்திலிருந்து, முரளிக்கு அருமையான சப்போர்ட் கொடுத்தார். 38வது ஓவரில், ஜெயசூர்யாவின் பந்தில் ஜஸ்டின் கெம்ப் stumped out ஆகி விக்கெட் இழந்தார், ஸ்கோர் 182-5. இலங்கை இன்னும் கொஞ்சம் புத்துயிர் பெற்றது. ஆனால், காலிஸ் திடமாக, நம்பிக்கை அளிக்கும் விதத்தில், ஆடிக் கொண்டிருந்தார். அடுத்த ஓவரில், மலிங்கா காலிஸ் கொடுத்த ரிடர்ன் கேட்சை தவற விட்டது, தென்னாபிரிக்காவுக்கு பெரிய சாதகமாகியது.

காலிஸ¤ம், போலக்கும், ஸ்கோரை 206 ரன்கள் (44.5) வரை, நிதானமாக ஆடி, எடுத்து வந்தனர். 45வது ஓவரின் ஐந்தாவது பந்தை, மலிங்கா ஒரு slower one ஆக வீச, அந்த ஓவரில் 6 ரன்கள் எடுத்த போலாக், CLEAN BOWLED. ஸ்கோர் 206-6. அப்புறம் நடந்தது வரலாறு! ஓவரின் கடைசிப் பந்தில், ஹாலும், ஒரு slower one மூலம் CLEAN BOWLED. ஸ்கோர் 206-7. இலங்கைச் சிங்கங்கள் கர்ஜிக்கத் தொடங்கின.

46வது ஓவரை வாஸ் வீசி, பீட்டர்ஸனை படாத பாடு படுத்தி, அந்த ஓவரில் ஒரு ரன்னே தந்தார். ஸ்கோர் 207-7! 4 ஓவர்களில், 3 ரன்களே தேவை, காலீஸ் இன்னும் ஆடிக் கொண்டிருந்தார். ஆனால், 47வது ஓவரை வீசப் போகிறவர் மலிங்கா ஆயிற்றே!

47வது ஓவரின் முதல் பந்தில், காலீஸ் அவுட்!!! ஆ·ப் ஸ்டம்புக்கு வெளியே வீசப்பட்ட அதி வேகப்பந்தை, காலிஸ் தொட, சங்கக்காரா டைவ் அடித்து, ஒரு மகத்தான காட்ச் பிடித்தார்!!! மலிங்காவுக்கு ஹாட்ரிக் (HATRICK) கிடைத்து விட்டது. ஆனால், இலங்கைக்கு இன்னும் வெற்றிக் கனி கிட்டவில்லையே! ஸ்கோர் 207-8, சிங்க கர்ஜனை தொடர்ந்து கேட்டது :)

பலியாடு போல ஆடுகளத்திற்கு வந்த நிதினி, ஓவரின் இரண்டாவது பந்தில் (a superb yorker) தனது நடு ஸ்டம்பை பரிதாபமாக இழந்து பெவிலியன் திரும்பினார். ஸ்கோர் 207-9, ஒரு ரன்னில் 4 விக்கெட்டுகள் வீழ்ந்தன! (மலிங்காவுக்கு நான்கு பந்துகளில் நான்கு விக்கெட்டுகள், இது ஒரு உலக ரெகார்ட்!) பேரிரச்சலைத் தொடர்ந்து ஸ்டேடியத்திலிருந்த ரசிகர்கள் அடுத்த பந்துக்குத் தயாரானார்கள்.

வலுவில்லா இதயம் கொண்டோர் பார்க்கக் கூடாத ஆட்டம் இது! லாங்கவெல்ட் ஒரு ரன் எடுத்து, மலிங்காவிடமிருந்து தப்பித்து, அந்தப் பக்கம் ஓடினார். ஓவரின் கடைசிப் பந்து, பீட்டர்ஸன்னின் ஆ·ப் ஸ்டம்ப்பை மயிறிழையில் தவற விட்டு, சங்கக்காராவின் கையுறைகளில் சரணடைந்தது. பீட்டர்ஸன்னும், தென்னாபிரிக்காவும், பிழைத்தன! ஸ்கோர் 208-9. 2 ரன்கள் தேவை, 3 ஓவர்களில்!

அடுத்த வாஸ் (அவரது கடைசி ஓவர் அது) ஓவரிலும், தீப்பொறி பறந்தது. லாங்க்வெல்ட் என்னவெல்லாமோ செய்து பார்த்தார். ஆனால், பந்து தான் பேட்டில் படவில்லை. Maiden over, really an over from HELL! ஸ்கோர் 208-9, 2 ரன்கள் தேவை, 2 ஓவர்களில்! வாஸ் 10-1-31-1

49வது ஓவரில் மலிங்கா vs பீட்டர்ஸன்! மலிங்கா வீசிய முதல் பந்து, அதி வேகமாக, பேட்டில் படாமல், விக்கெட் கீப்பரிடம் சென்றது. இரண்டாவது பந்து, பேட்டின் ஓரத்தில் பட்டு .................... அதி வேகமாக பவுண்டரியை அடைய, anti-climax ஆக தென்னாபிரிக்கா வெற்றி, 48.2 ஓவர்களில், It was ALL OVER!

அன்று தோற்றிருந்தாலும் கூட, இலங்கையின் fighting spirit-ஐ எவ்வளவு பாராட்டினாலும் தகும்! 210 என்ற மிகக் குறைந்த இலக்கை, அவர்கள் defend செய்த விதம் அருமையிலும் அருமை. இன்னும் ஒரு 25 ரன்கள் அதிகம் எடுத்திருந்தால், இலங்கை மிக நிச்சயமாக வெற்றி பெற்றிருக்கும் என்று தோன்றுகிறது.

இலங்கை உலகக் கோப்பையை வென்றால், எனக்கு மகிழ்ச்சி தான் :)

என்றென்றும் அன்புடன்
பாலா

*** 330 ***

Appraisal - Managerial Tips "in English" - Part 1

தமிழில் இந்தக் கட்டுரையை வாசிக்க இங்கு சுட்டவும்.

சில நண்பர்கள் கேட்டுக் கொண்டதற்கு இணங்க, தமிழில் எழுதிய மேற்கண்ட பதிவை, ஆங்கிலத்தில் மொழி பெயர்த்து, இங்கு பதிவாக இடுகிறேன்.
*****************************
I attended a 3-hour training session on Appraisal. Normally, sessions like these will trigger a feeling of boredom (in me!) in the first 30 minutes itself. But for a change, this one was VERY INTERESTING and educative as the trainer was skilled and a good speaker as well. The session was interactive too. The trainer used anecdotes and small stories to substantiate the points he was trying to make. Let us see some of them in this posting.

1. Apprasial is not about evaluating the person, it is more about evaluating the persons' performace in the past year. This particular aspect is not given importance by many managers! For the manager to assess the performance of an employee effectively, he should ask himself, "Did the employee honestly perform the tasks assigned to him/her to the best of his/her abilities?". Also, the manager needs to get into the shoes of the employee he is assessing, to make the appraisal "objective". Let us look at an anecdote, to understand this aspect.

A goldsmith melts the gold to purify it before embarking on the process of making gold ornaments. In the olden days, goldsmiths followed a technique to know when the gold attained the required "purefied state"! That is, when he saw the reflection of his own face in the melted "gold drop", he learnt that the gold had reached its "purified state". This is an invaluable lesson he had learnt from his experience. This is applicable to annual appraisal as well :)

2. The trainer gave a brilliant example to prove the point that it is not advisable to assess an employee based on his/her old experience /records or external apperance.

A farmer went to the market place to buy an ox (bull), to be used for ploughing. He came across a strong looking ox and after checking its teeth (to know the age), he asked for the price. As the price seemed to be very less, he immediatley paid the price, the buyer asked for and drove the ox away.

The strong looking ox walked with the farmer for about 40 feet and then abruptly stopped for some rest(!), again started walking for about 40 feet and stopped and this went on for a while. The farmer was puzzled and went back to the market and admonished the seller that he had cheated him. The seller responded, "Sir, that ox was previously used to pull the garbage cart in the corporation. That is why it is behaving like this. It will become alright in due course of time, don't worry!" :)

3. It is important that the Work place is such that an employee feels happy and motivated at work. To prove that this is not the case in many organizations, he gave a piece of statistics to substantiate this point!!!

Narayana Hridhayalaya considered to be the best cardiac hospital in Asia, did a survey and found out that majority of the people who suffered an heart attack got admitted on a Monday! Monday is the day when people return to work after the weekly off and it is "quite nmormal" that the work pressure is very high on Mondays :)

As the saying goes, "Children generally walk to school, but run back home" implies that children simply love home and parents more than what they get at school!

4. The trainer said that the meaning of the word "Empowerment" was generally wrongly understood. That is, You cannot "empower" an employee by giving him more responsibility and authority! You need to make that employee realize his/her self-worth (in terms of his/her knowledge, work experience, skills ...) and make him self-motivated to truly "empower" that employee! Is it not ?? This meaning of "empowerment" was a real "eye opener" for me :)

5. One can understand more about "empowerment" looking at one of the motto statements of Hewlett Packard. It says:
"Every Employee has the RIGHT to committ a mistake!"
which means that this "freedom to committ mistakes" allows the employee to come out of his/her "comfort" zone to the "courage" zone and makes the employee aspire for more. It also helps in the career growth of the employee.

As a manager, when one appraises the performance of a person working under him, he realizes that the said employee's successes tend to fall in the "comfort" zone and his/her failures tend to fall in the "courage" zone. A manager needs to keep this in mind during an appraisal.

I will continue this article in my next posting, Thanks for reading.

என்றென்றும் அன்புடன்
பாலா

*** 329 ***

328. பங்களாதேஷ்-தென்னாபிரிக்கா போட்டி - ஓர் அலசல்

எனது முந்தைய பதிவில் இந்த போட்டி குறித்து கீழ்க்கண்டவாறு எழுதியிருந்தேன்:
*****************
இதுவும் ஒரு பிரமாதமான ஆட்டம்! Providence ஸ்டேடியத்தில், providence அன்று பங்களாதேஷ் பக்கம் இருந்தது :)

ஸ்மித் டாஸில் வென்று, நல்ல பேட்டிங் பிட்ச் என்று அனுமானித்து, பங்களாவை பேட் செய்ய அழைத்தார். அதற்குக் காரணம், தென்னாபிரிக்காவின் அப்போதிருந்த negative நெட் ரன் ரேட் ! பங்களாவை குறைந்த ரன்களில் சுருட்டி விட்டு, இலக்கை குறைந்த ஓவர்களில் எட்டி, NRR-ஐ அதிகப்படுத்த வேண்டும் என்ற ஸ்மித்தின் நினைப்பில் மண் விழுந்தது!

பங்களா 251 ரன்கள் எடுத்து, NRR-ஐ கூட்டுவது என்ன, வெல்வதே கடினம் என்ற நிலைக்கு தென்னாபிரிக்காவைத் தள்ளியது :) முந்தைய 2 மேட்ச்களில் படுதோல்வியை சந்தித்த பங்களா அன்று வெற்றி வெறியுடனும், உத்வேகத்துடனும் விளையாடியது.

முதல் 25 ஓவர்களில் சற்றுத் தடுமாறி 92-4 என்ற நிலையில் இருந்த பங்களா, அஷ்ராஷபுலின் 87 ரன்களின் (83 பந்துகள்) பலத்திலும், அஷப்டாப் மற்றும் மொர்டாஸாவின் அதிரடி ஆட்டத்தின் பயனாலும், அடுத்த 25 ஓவர்களில் 159 ரன்களை குவித்தது. கடைசி பத்து ஓவர்களில் மட்டும் 80 ரன்கள். நெல், போலாக் தவிர மற்ற பந்து வீச்சாளர்கள் துவைக்கப்பட்டனர் !

தென்னாபிரிக்கா 48.4 ஓவர்களில், 184 ரன்களுக்கு ஆல் அவுட் ஆகி, பங்களாதேஷதக்கு மற்றுமொரு முறை Giant killer பட்டம் வழங்க வழி செய்தது :) தென்னாபிரிக்கா செமி ஷபைனலுக்கு தகுதி பெறுமா என்ற சந்தேகம் வந்து விட்டது எனக்கு :( இந்த ஆட்டம் குறித்து விரிவாக பின்னர் எழுத உத்தேசம்.
***********************
அந்த உத்தேசத்தைத் தொடர்ந்து, விரிவான பதிவு இங்கே :)

அன்றைய பங்களாதேஷ் பேட்டிங்கில், 4 ஆட்டக்காரர்களை குறிப்பிட்டு ஆக வேண்டும்.

முதலில், தமீம் இக்பால், இளம் வீரரான இவர், பொறுமையாக ஆடி, 38 ரன்கள் எடுத்ததே, அவர் பின் வந்த பேட்ஸ்மன்களுக்கு, தைரியமாகவும், உத்வேகத்துடனும் விளையாட தளம் அமைத்துக் கொடுத்தது என்று கூறுவேன். 20வது ஓவரில் அவர் அவுட் ஆனபோது ஸ்கோர், 69-3, என்னளவில், இது 10 ஓவர்களில், 60-5 என்ற ஸ்கோரை விட எவ்வளவோ மேல், இல்லையா ?

அடுத்து, சுறுசுறுப்பாக ஆடிய அ·ப்டாபும் (35 of 43 balls), இறுதி வரை ஆடிய அஷ்ர·புலும் (87 of 83 balls) ஜோடி சேர்ந்து 84-4 என்ற நிலையிலிருந்து ஸ்கோரை 160 வரை எடுத்துச் சென்றனர். அதாவது, 14 ஒவர்களில், 76 ரன்கள் எடுத்தபோதே, ஆட்டம் தென்னாபிரிக்காவின் பிடியிலிருந்து நழுவத் தொடங்கியது என்பது என் அனுமானம். இன்னிங்க்ஸின் கடைசி கட்டத்தில், அஷ்ர·புல் மூன்று ஸ்டம்புகளையும் விட்டு off-side பக்கம் நகர்ந்து அடித்த 2 பவுண்டரிகள் அருமையிலும் அருமை, Improvisation at its very best என்று கூறலாம்.

அடுத்து, அஷ்ர·புலுக்கும், மொர்டாஸாவுக்கும் இடையாயான 54 ரன்கள் (5.1 ஓவர்களில்!) பார்ட்னர்ஷிப் குறிப்பிடத்தக்கது. மொர்டாஸா 16 பந்துகளில் 25 ரன்கள் (3 fours, 1 six) எடுத்தார். குறிப்பாக, மக்கயா நிதினியையும் (இவர் பந்தில் ஒரு straight sixer அடித்தார்!), லாங்கவெல்ட்டையும், இருவரும் 'பெண்டு' நிமிர்த்தியது கண்கொள்ளா காட்சி!

தென்னாபிரிக்கா தரப்பில், ஆண்ட்ரு நெல் (5-45) சிறப்பாக பந்து வீசினார். முதல் 3 விக்கெட்டுகளையும் இவரே வீழ்த்தி, பங்களாவை சற்று தடுமாற வைத்தார். போலாக்கும் (விக்கெட் எதுவும் எடுக்காவிட்டாலும்) எகானமிகலாக பந்து வீசினார். தென்னாபிரிக்கா ·பீல்டிங் எப்போதும் போல சிறப்பாகவே இருந்தது.

பங்களா எடுத்த ஸ்கோரான 251-8 என்பது, பங்களாவுக்கு உலகக் கோப்பை ரெகார்ட் ஸ்கோர் என்பது குறிப்பிடவேண்டியது.

தொடர்ந்து ஆடிய தென்னாபிரிக்கா செய்ததை Harakiri என்றே கூற வேண்டும். நிதானம் துளியும் இல்லாமல், பங்களாவை எளிதில் வீழ்த்தி விடலாம் என்ற திமிரில், அவரவர் தமது விக்கெட்டுகளை பறி கொடுத்தனர். இது ஒரு பொறுமையற்ற அணுகுமுறை. 251 என்பது துரத்த முடியாத ஸ்கோர் அல்ல, களமும் சற்று சிறியதே! தென்னாப்பிரிகா பேட்டிங்கில் வலு மிக்கது என்பதை அனைவரும் ஒப்புக் கொள்வர்.

தெ.ஆ தனது 6வது ஓவரிலேயே (18-1), கேப்டன் ஸ்மித்தை இழந்தது. ஸ்கோர் அறுபதுகளில் இருந்தபோது, ஓரளவு நன்றாக ஆடிக் கொண்டிருந்த ஜாக் காலிஸையும், டிவிலியர்ஸையும், பிரின்ஸையும் (அனாவசிய ரன் அவுட்) தொடர்ச்சியாக இழந்ததில்ஸ்கோர், 67-4, பங்களா லேசாக ரத்த வாடையை முகர்ந்தது :)

பந்து வீச்சும் சுறுசுறுப்பானது. ரஸாக், ர·பீக், என்று 2 இடக்கை சுழற்பந்து வீச்சாளர்களும், tight line and Length-இல் பந்து வீசத் தொடங்கினர். அடுத்த 7 ஓவர்களில், 20 ரன்களே எடுக்க முடிந்தது! ஒரு ஸிக்ஸர் அடித்த பவுச்சர், அடுத்த பந்தில் அவுட், 87-5, அடுத்து ஜஸ்டின் கெம்ப் caught and bowled, 87-6, இந்த 2 விக்கெட்டுகளையும் வீழ்த்தி, பங்களாவை வெற்றிப் பாதைக்கு விரைவாக இட்டுச் சென்றவர் சகிபுல் ஹஸன் (இவர் part-time left arm spinner!). முக்கியமான ஒரு விஷயம், பங்களா வீரர்களின் ஆவரேஜ் வயது 23 என்பது :)

இதற்கு மேல் ஆட்டம் பற்றி சொல்ல பெரிதாக எதுவுமில்லை, கிப்ஸ் (56 ரன்கள்) மட்டும் இறுதி வரை விக்கெட் இழக்காமல் இருந்ததில், தெ.ஆ. 48.4 ஓவர்களில் 184-க்கு ஆல் அவுட், பங்களாவுக்கு ஒரு மகத்தான ஒரு வெற்றி, இது பங்களாதேஷின் 5-வது உலகக்கோப்பை வெற்றி, முந்தைய நான்கை விட அதிகப் பிரகாசமான வெற்றியும் கூட!!! அடுத்து, பங்களா அயர்லாந்தையும், இங்கிலாந்தையும், வெஸ்ட் இண்டீஸையும் வீழ்த்தினால் (though it is quite a Long shot!),செமி·பைனல் சுற்றுக்குச் செல்லக் கூட வாய்ப்பிருக்கிறது.

அடுத்த நாள் பங்களா செய்தித் தாள்களில், "புலிகள் மறுபடி உறுமத் தொடங்கின" "உலகின் நம்பர் 1 அணியை பங்களா வீழ்த்தியது" போன்ற தலைப்புச் செய்திகளை காண முடிந்தது!!!!

எனது முந்தைய பதிவில் ஓர் அனானி நண்பர் என்னை ஒரு "உடு உட்டிருந்தார்":
*********************
Anonymous said...
Dear Mr.Bala

"""அயர்லாந்து பாக் அணியை வீழ்த்தியதும், பங்களாதேஷ் இந்தியாவை வீழ்த்தியதும் என்னளவில், Aberrations மட்டுமே ! """
""""பங்களாதேஷ் அணி, இந்தியாவில் உள்ள ஒரு நல்ல ரஞ்சி அணியுடன் (மும்பை, மேற்கு வங்கம் ... ) ஒப்பிடத்தக்கது, அவ்வளவே!""""

இதை சொன்ன நீங்களே இப்போது பின்வருமாறு சொல்லி ஸ்மைலியெல்லாம் போட்டாலும் ஒத்துக் கொள்ள முடியாது.

"""தென்னாபிரிக்கா 48.4 ஓவர்களில், 184 ரன்களுக்கு ஆல் அவுட் ஆகி, பங்களாதேஷதக்கு மற்றுமொரு முறை Giant killer பட்டம் வழங்க வழி செய்தது :) """"

Clearly you have erred in your judgement.Accept it.Bangladesh is playing better cricket that you are assuming or projecting.
******************
அனானி இப்படிக் கேட்பதில் தவறில்லை தான். சற்று கடுப்பில் தான் நான் எழுதியிருந்தாலும், நான் கூறியது தவறு என்று ஒப்புக் கொள்ள, பங்களாதேஷ் அடுத்து ஆடவுள்ள இரண்டு ஆட்டங்களில் (இங்கிலாந்து மற்றும் வெஸ்ட் இண்டீஸ¤க்கு எதிராக) ஒரு ஆட்டத்திலாவது வெற்றி பெற வேண்டும், பார்க்கலாம் :)

என்றென்றும் அன்புடன்
பாலா

*** 328 ***

WC 2007 சூப்பர் எட்டு ஆட்டங்கள் - ஓர் அலசல்

எதிர்பார்த்தது போலவே, சில ஆட்டங்கள் விறுவிறுப்பாகவும், சில ஆட்டங்கள் ஒரு தலை பட்சமாகவும் அமைந்தன. இவற்றில் சிறந்த ஆட்டங்கள் என்று சொல்லக்கூடியவை, இங்கிலாந்து vs இலங்கை ஆட்டமும், பங்களாதேஷ் vs தென்னாபிரிக்கா ஆட்டமும்!

1. England vs Ireland
இவ்வாட்டம் ஓரளவு ரசிக்கத்தக்கதாய் அமைந்தது. முதல் சுற்றில் பாகிஸ்தானை அயர்லாந்து அணி வீழ்த்தியிருந்ததால், ஒரு வித எதிர்பார்ப்பு இருந்தது உண்மையே. முதலில் பேட் செய்த இங்கிலாந்து ஒரு கட்டத்தில் 113-4 என்று தடுமாறியபோது, அயர்லாந்து வீரர்கள் உற்சாகமாய் காணப்பட்டனர்! எப்போதும் போல், காலிங்வுட் (90 ரன்கள்), தனது இன்னிங்க்ஸை அருமையாக pace செய்து, பிளின்டா·புடன் ஜோடி சேர்ந்து கலக்கியதில், இங்கிலாந்து ஒரு வழியாக 266 ரன்கள் என்ற challenging இலக்கை எட்டியது.

Neil O'Brien-ஐ மட்டுமே நம்பியிருந்த அயர்லாந்து அணி, 218 ரன்களில் சுருண்டது. அவர் 63 ரன்கள் எடுத்தார். 250-க்கு மேலான ஓர் இலக்கை துரத்தும்போது, ரன் ரேட் 7-7.5 ர்னகளுக்கு மிகாமல் பார்த்துக் கொள்வது அவசியம் என்ற பால பாடத்தை அயர்லாந்து அன்று பெற்றது :)

2. Australia vs Bangladesh
இந்தியாவை வீழ்த்திய பங்களாதேஷ் இத்தனை மோசமாக தோற்கும் என்று நினைக்கவில்லை. மழையும் சதி செய்தது. 22 ஓவர்களாக குறைக்கப்பட்ட ஆட்டத்தில், பங்களா நிர்ணயித்த வெற்றி இலக்கான 105 ரன்களை ஆஸ்திரேலியா மிக எளிதாக 14-வது ஓவரிலேயே, விக்கெட் இழப்பின்றி எட்டி, வெற்றி பெற்றது. கிளென் மெக்ரா 16 ரன்கள் கொடுத்து 3 விக்கெட்டுகளை வீழ்த்தி, ஆட்ட நாயகன் ஆனார்.

3. Srilanka vs West Indies
இந்தியா, பாகிஸ்தானுக்கு அடுத்தபடியாக, வெஸ்ட் இண்டீஸ¤க்கு நேரம் சரியில்லை போல தெரிகிறது. ஏற்கனவே, சூப்பர் எட்டு ஆரம்பத்தில், ஆஸ்திரேலியா மற்றும் NZ அணிகளிம் மண்ணைக் கவ்விய வெஸ்ட் இண்டீஸ், தனது மூன்றாவது தொடர் தோல்வியை சந்தித்தது! முதலில் ஆடிய இலங்கை, ஜெயசூரியாவின் திரித சதத்தின் (115) மற்றும் கேப்டன் ஜெயவர்த்தனேயின் 82 ரன்களின் வலிமையில் 303 ரன்கள் குவித்தது! தில்ஷன் ஒரு Cameo இன்னிங்க்ஸ் ஆடி 39 ரன்கள் எடுத்ததும் இங்கு குறிப்பிடத்தக்கதே.

கேய்ல் (Gayle) அல்லது லாரா சிறப்பாக விளையாடாத எந்த ஓர் ஆட்டத்திலும், வெஸ்ட் இண்டீஸ் தடுமாறும் என்பதை அனைவரும் அறிவர். அது போலவே, அவர்கள் இருவரும் ஏமாற்றியதால், ஆட்டம் களை கட்டவில்லை. 42-3 என்ற நிலையிலிருந்து 134 ரன்கள் வரை, சர்வானும் சந்திரபாலும் ஜோடி சேர்ந்து விளையாடியபோதும் வெஸ்ட் இண்டீஸ் வெற்றி பெறும் என்ற நம்பிக்கை குறைவாகவே இருந்தது. முரளியை அவர்கள் சிறப்பாக எதிர் கொண்டனர் என்பது குறிப்பிடத்தக்கது. இறுதியில், 190 ரன்களில் சுருண்டு, வெஸ்ட் இண்டீஸ் பெரும் தோல்வியைத் தழுவியது. வெஸ்ட் இண்டீஸ் அடுத்த சுற்றுக்குச் செல்லாது என்பது என் கணிப்பு. ஜெயசூர்யா (இவர் 3 விக்கெட்டுகளையும் அன்று வீழ்த்தினார்!) ஆட்ட நாயகனாக அறிவிக்கப்பட்டார்.

4. Newzealand vs Bangladesh
பங்களாதேஷ் 10 ஆட்டங்கள் ஆடினால், ஒரு ஆட்டத்தில் மட்டுமே வெற்றி பெற வாய்ப்பிருப்பதாக நான் எழுதியதை ஊர்ஜிதம் செய்யும் வகையில், பங்களா மிக மோசமாக ஆடி, 174 ரன்களுக்கு ஆல்அவுட் ஆகியது. NZ 29.2 ஓவர்களில், வெற்றி இலக்கை சுலபமாக எட்டி வென்றது! ஆட்டத்தில் சிறப்பம்சம், NZ கேப்டன் ·பிளெமிங் அடித்த அருமையான சதம், அவரே ஆட்ட நாயகனும் கூட!

5. South Africa vs Ireland
இவ்வாட்டத்தில், குறிப்பிட்டு எழுத எதுவும் இருப்பதாக நான் கருதவில்லை. மழையின் காரணமாக ஆட்டம் 35 ஓவர்களாக குறைக்கப்பட்டது. தென்னாபிரிக்காவுக்கு சுலபமான வெற்றி! 66 ரன்கள் எடுத்த ஜேக் காலிஸ் ·பார்முக்கு வருவதற்கான அறிகுறி தெரிந்தது. எதிரணிகள் உஷார்!!!

6. Srilanka vs England
சூப்பர் எட்டு சுற்றின் மகத்தான ஆட்டமிது! நிறைய திடுக் திடுக் கணங்களும், திருப்பங்களும் நிறைந்திருந்தது! முதலில் பேட் செய்த இலங்கை அணயின் இன்னிங்க்ஸில், தரங்கா-ஜெயவர்த்தனே பார்ட்னர்ஷிப் தவிர்த்து, குறிப்பிடும்படியாக சொல்ல எதுவுமில்லை. ·பிளின்டா·பும் (3-35) மஹமுதும் (4-50) சிறப்பாக பந்து வீசினர். இலங்கை 235 ரன்கள் எடுத்தது.

தொடர்ந்து ஆடிய இங்கிலாந்து, 11 ரன்களில் 2 விக்கெட்டுகளை இழந்தாலும், பீட்டர்ஸன்-பெல் பார்ட்னர்ஷிப் (90 ரன்கள்) வாயிலாக மீண்டு வந்த சமயத்தில், 4 முக்கிய விக்கெட்டுகளை (பெல், பீட்டர்ஸன், ·பிளின்டா·ப், காலிங்வுட்) அடுத்த 32 ரன்களில் பறிகொடுத்து, தோல்விக்குத் தன்னை ஆயத்தப்படுத்தி கொண்டது, ஸ்கோர் 133-6 ! பீட்டர்ஸன் மறுபடியும் முரளியின் Bunny ஆனார், இங்கிலாந்தின் ஆபத்பாந்தவனான காலிங்வுட் , பெர்னாண்டோ பந்தில் LBW !

அதன் பின் நடந்தது ஒரு சூப்பர் FIGHTBACK! 21 வயதான (இந்திய வம்சாவழியில் வந்த) பொப்பராவும், பந்து காப்பாளார் நிக்ஸனும் ஜோடி சேர்ந்து கவனமாக ஆடி, இலங்கையின் சுழற்பந்து வீச்சாளர்களை அழகாக எதிர்கொண்டு, ஸ்கோரை 220 வரை எடுத்து வந்தனர். முரளி போட்ட பந்தை நிக்ஸன் reverse sweep செய்து ஆறு அடித்தது அற்புதம்! ரன் ரேட் கிட்டத்தட்ட 10 வரை ஏறியபோதும், இருவரும் கலங்காமல் ஆடினர். நம் இந்திய அணி இவர்கள் இருவரிடமும் கற்க வேண்டியது நிறைய உள்ளது ;-)

7 பந்துகளில் 16 ரன்கள் தேவை என்ற நிலையில், நிக்ஸன் ஆட்டமிழந்தார். ஆனாலும், இளம் பொப்பரா நம்பிக்கை இழக்காமல், ஒரு பவுண்டரி அடிக்க, இறுதி ஓவரில் 12 ரன்கள் இங்கிலாந்து எடுத்தால் வெற்றி என்ற நிலைமை! முதல் நான்கு பந்துகளில், பொப்பரா 8 ரன்கள் எடுத்தார், ஒரு பவுண்டரி சேர்த்து! இப்போது, இரண்டு பந்துகளில் 4 ரன்கள் தேவை, மஹமுது ஒரு ரன் எடுக்க, கடைசி பந்தில் இங்கிலாந்தை கரை சேர்க்க, பொப்பரா எடுக்க வேண்டியது மூன்று ரன்கள் என்றிருந்தபோது, பொப்பரா பெர்னாண்டோவின் பந்தில் Clean Bowled ஆனது துரதிருஷ்டமே!!!

இலங்கை இரண்டு ரன்களில் வெற்றி பெற்றது. Real Pulsating Finish! இந்தியா பங்கு பெறாத ஆட்டம் என்றபோதும், எனக்கே சற்று டென்ஷனாகி விட்டது :) இந்தியாவை வெளியேற்றிய இலங்கை தோற்க வேண்டும் என்ற என் ஆசையும் நிராசையாகி, தூக்கமும் கெட்டது தான் மிச்சம் :) மேட்ச் முடியும்போது, மணி காலை 3.15 !!!

7. Bangladesh vs South Africa
இதுவும் ஒரு பிரமாதமான ஆட்டம்! Providence ஸ்டேடியத்தில், providence அன்று பங்களாதேஷ் பக்கம் இருந்தது :)

ஸ்மித் டாஸில் வென்று, நல்ல பேட்டிங் பிட்ச் என்று அனுமானித்து, பங்களாவை பேட் செய்ய அழைத்தார். அதற்குக் காரணம், தென்னாபிரிக்காவின் அப்போதிருந்த negative நெட் ரன் ரேட் ! பங்களாவை குறைந்த ரன்களில் சுருட்டி விட்டு, இலக்கை குறைந்த ஓவர்களில் எட்டி, NRR-ஐ அதிகப்படுத்த வேண்டும் என்ற ஸ்மித்தின் நினைப்பில் மண் விழுந்தது!

பங்களா 251 ரன்கள் எடுத்து, NRR-ஐ கூட்டுவது என்ன, வெல்வதே கடினம் என்ற நிலைக்கு தென்னாபிரிக்காவைத் தள்ளியது :) முந்தைய 2 மேட்ச்களில் படுதோல்வியை சந்தித்த பங்களா அன்று வெற்றி வெறியுடனும், உத்வேகத்துடனும் விளையாடியது.

முதல் 25 ஓவர்களில் சற்றுத் தடுமாறி 92-4 என்ற நிலையில் இருந்த பங்களா, அஷ்ரா·புலின் 87 ரன்களின் (83 பந்துகள்) பலத்திலும், அ·ப்டாப் மற்றும் மொர்டாஸாவின் அதிரடி ஆட்டத்தின் பயனாலும், அடுத்த 25 ஓவர்களில் 159 ரன்களை குவித்தது. கடைசி பத்து ஓவர்களில் மட்டும் 80 ரன்கள். நெல், போலாக் தவிர மற்ற பந்து வீச்சாளர்கள் துவைக்கப்பட்டனர் !

தென்னாபிரிக்கா 48.4 ஓவர்களில், 184 ரன்களுக்கு ஆல் அவுட் ஆகி, பங்களாதேஷ¤க்கு மற்றுமொரு முறை Giant killer பட்டம் வழங்க வழி செய்தது :) தென்னாபிரிக்கா செமி ·பைனலுக்கு தகுதி பெறுமா என்ற சந்தேகம் வந்து விட்டது எனக்கு :( இந்த ஆட்டம் குறித்து விரிவாக பின்னர் எழுத உத்தேசம்.

இந்த ஆட்டம் குறித்து விரிவாக இங்கே எழுதியிருக்கிறேன் !

என்றென்றும் அன்புடன்
பாலா

*** 327 ***

326. இடஒதுக்கீடு, க்ரீமி லேயர், சரத்பாபு et al

முதலில் டிஸ்கி: எ.அ.பாலா என்ற நான் இடஒதுக்கீட்டுக்கு எதிர்ப்பாளன் கிடையாது. சாதி அடிப்படையிலான இடஒதுக்கீடு முற்றிலும் உடனடியாக களையப்பட வேண்டும் என்பதிலும் எனக்கு நம்பிக்கை இல்லை. அதே நேரத்தில், இடஒதுக்கீட்டின் பலன் என்பது சரியானவர்களைச் சென்று அடைதல் அவசியம் என்று நினைக்கிறேன்! அது போலவே, சிலர் போல் கவைக்குதவாத புள்ளி விவரங்கள் மற்றும் லிங்குகளை வாரி வழங்கி வாசிப்பவரை திக்குமுக்காட வைக்கும் நுண்கலையும் யானறியேன் :) Just என் கருத்துக்களை மட்டும் உங்கள் வாசிப்புக்கு வைக்கிறேன்.

1. இடஒதுக்கீடு என்ற கருவி சமூக ஏற்ற தாழ்வை சமன் செய்வதற்கான ஏற்பாடேயன்றி, பொருளாதார ஏற்ற தாழ்வை சமன் செய்வதற்கானது அல்ல என்று வழமையாக ஒரு வாதம் முன் வைக்கப்படுகிறது. இது க்ரீமி லேயரின் சொத்தை வாதம்! தற்போதைய சூழலில், பொருளாதார உயர்வு, சமூகத்தில் பெருமளவு ஒரு அந்தஸ்தை பெற்றுத் தான் தருகிறது. உடனே நடுத்தர உயர்சாதியினருக்கு இது சுலபமாக கிடைத்து விடுகிறதே என்று அரற்றுவது சரியான அணுகுமுறை ஆகாது.

பொருளாதார மேம்பாட்டுக்கு கல்வி ஒரு முக்கியக் காரணியாய் விளங்கும்போது, இடஒதுக்கீடு என்பது பொருளாதாரத்தில் பின் தங்கியவர்களுக்கு (பரம் ஏழைகள் என்று கூற வரவில்லை!) அதிக பலன் தர வேண்டும் என்று எதிர்பார்ப்பது தவறில்லை. அதனாலேயே இடஒதுக்கீட்டிலிருந்து க்ரீமி லேயர் (அது சிறிய சதவிகிதமாக இருந்தாலும்!) விலக்கப்பட வேண்டும். அதே நேரத்தில், க்ரீமி லேயரை வரையறுப்பது எப்படி என்பது குறித்து ஆக்கபூர்வமாக சிந்தித்தல் அவசியமாகிறது.

2. OBC க்ரீமி லேயர் (அதை எப்படி வரையறுப்பது என்பது குறித்து பல கருத்துகள் நிலவலாம்) துளியும் சமூக மேம்பாடு பெறவில்லை என்று வாதிடும்போதும், இடஒதுக்கீடு பொருளாதார ஏற்ற தாழ்வை சமன் செய்வதற்கான கருவி அன்று என்று கூறும்போதும், உயர்சாதி ஏழைகள் அனைவருமே சமூகத்தில் அந்தஸ்து பெற்றவர்கள் என்ற கூற்று, நகைமுரணாகி விடுகிறது.

3. உயர்சாதி க்ரீமி லேயருக்கு அரசுக் கல்லூரிகளில் இடமில்லை என்ற பட்சத்தில், OBC-யில் க்ரீமி லேயரை விலக்கலாம் என்று வாதிடுவது, வெறுப்பையும், துவேஷத்தையும் மட்டுமே வளர்க்க உதவும்! அது, OBC க்ரீமி லேயருக்கும் அரசுக் கல்லுரிகளில் இடம் தரத் தேவையில்லை, என்ற கருத்தை முன் வைக்க இடமளிக்கிறது என்பதை மறந்து விடக் கூடாது.

முதலில் OC என்பது OPEN Competition, எந்த சாதியினர் வேண்டுமானாலும் போட்டியிடலாம். இந்த 31% என்பது உயர்சாதியினருக்கான இடஒதுக்கீடு அல்ல! ஆனால், பட்டப்படிப்பில், BC-க்கான 50%-ம், உயர்கல்வியில் OBC-க்கான 27%-ம், அவர்களுக்கென்று பிரத்யேகமாக அளிக்கப்பட்டுள்ள இடஒதுக்கீடு என்பதை புரிந்து கொண்டே, "உயர்சாதி க்ரீமி லேயரே, நீ இதற்குத் தயாரா, அதற்குத் தயாரா?" என்று அறைகூவல் விடுவது வேடிக்கையாக இருக்கிறது.

The Simple Logic here is, "What is applicable in Reserved categories, need not necessarily apply for Open Competition"!!!

4. க்ரீமி லேயர் பிரச்சினைக்கான தீர்வு என்று நோக்கும்போது, என்னளவில், OC-க்கான 31%-இல் ஒரு 8-9%-ஐ பொருளாதாரத்தில் பின் தங்கியவர்களுக்கு (இதிலும் பிற்படுத்தப்பட்ட வகுப்பினர் வருவர் என்பதை நினைவில் கொள்க!) ஒதுக்கலாம் என்பது ஏற்றுக் கொள்ளத் தக்கதே!

5. அது போலவே, உயர்கல்வியில் அளிக்கப்படவுள்ள 27% இடஒதுக்கீடில் ஒரு 9-10%-ஐ, பிரத்யேகமாக க்ரீமி லேயருக்கு என்று ஒதுக்கி விடுவது நல்லது!!! இதன் மூலம், எல்லா விவாதங்களும், சண்டைகளும் முற்று பெற்று விடும்! அரசியல் கட்சிகளின் ஓட்டு வங்கிக்கும் பெரிய அளவில் ஆபத்து எதுவும் ஏற்படாது! அரசே பந்த் என்று ஒன்றை நடத்த வேண்டிய கேலிக்கூத்தான சூழலும் உருவாகாது :)

6. அடுத்து, க்ரீமி லேயரை இடஒதுக்கீட்டிலிருந்து விலக்குதல் அவசியம் என்று கூறும் அதே நேரத்தில், Open Competition-இல் போட்டியிடும், பொருளாதாரத்தில் மேம்பட்டவர்களுக்கு கல்விக் கட்டணத்தை உயர்த்த வேண்டும் என்பதும் ஏற்றுக் கொள்ளத் தக்கதே. People who can afford an higher cost towards education must be asked to pay higher fees. எந்த அளவு உயர்த்தலாம், அதிலும் gradation தேவையா --- இவை போன்று சிந்திக்க நிறைய இருக்கிறது.

7. இங்கு வலை இடஒதுக்கீடு விவாதத்தில் கலந்து கொள்ளும் பெரும்பாலானவர், க்ரீமி லேயர் வரையறைக்குள் வருவதால், இவர்கள் முன்னிறுத்தும் கருத்துகள் ஒரு சார்புத் தன்மை கொண்டவையாக இருப்பதில் ஆச்சரியமில்லை. Self preservation overrides everything else (என்னையும் சேர்த்துத் தான் சொல்கிறேன்:))

சாதி அடிப்படையில் பிற்படுத்தப்பட்ட, பொருளாதாரத்தில் மிக நலிந்த வகுப்பைச் சேர்ந்த, இடஒதுக்கீட்டின் பலனால் (அதை விட உழைப்பால்!) முன்னேறிய, சரத்பாபு என்ற ஆதர்ச இளைஞரின் கருத்துகளை இங்கு முன் வைப்பதுவும் அவசியமாகிறது. அவர் இடஒதுக்கீடு என்பது ஒரு தலைமுறைக்கு மேல் (அதனால் பயன் அடைந்தவர்களூக்கு) நிறுத்தப்பட வேண்டும் என்று ஆணித்தரமான கருத்தை முன் வைக்கிறார்.
*****************
Reservation should be a mix of all criteria. If you take a caste that comes under reservation, 80 per cent of the people will be poor and 20 per cent rich, the creamy layer. For the general category, it will be the other way around.

I feel equal weightage should be given for the economic background. A study has to be done on what is the purpose of reservation and what it has done to the needy. It should be more effective and efficient. In my case, I would not have demanded for reservation. I accepted it because the society felt I belonged to the deprived class and needed a helping hand.

Today, the opportunities are grabbed by a few. They should be ashamed of their ability if they avail reservation even after becoming an IAS officer or something like that. They are putting a burden on the society and denying a chance to the really needy.

I feel reservation is enough for one generation. For example, if the child's father is educated, he will be able to guide the child properly.

Take my case, I didn't have any system that would make me aware of the IITs and the IIMs. But I will be able to guide my children properly because I am well educated. I got the benefits of reservation but I will never avail of it for my children. I cannot even think of demanding reservation for the next generation.
****************
சரத் போன்ற இளைஞர்கள் தான் இந்தியாவின் எதிர்காலம் என்று நினைக்கும்போது, மிகுந்த நம்பிக்கை ஏற்படுகிறது. சாதி அடைப்படையிலான இடஒதுக்கீடு காலம் காலமாக (eternally) தொடர வேண்டும் என்று யாரும் நினைக்க மாட்டார்கள் என்ற நம்பிக்கையில் அடிப்படையிலேயே என் கருத்துகளை முன் வைத்துள்ளேன்!

8. "க்ரீமி லேயரை இடஒதுக்கீட்டிலிருந்து விலக்க வேண்டும் என்று கோருபவர்கள், OBC ஏழைகளுக்காக "முதலைக் கண்ணீர்" வடிக்கிறார்கள்" என்று அரற்றுபவர்கள், "சவுண்டி பிராமணனாக இருந்தாலும், அவனுக்கும் திமிர் அதிகம் தான்" என்று சாடிக் கொண்டே, அவனது "முன்னேற்றத்திற்காக" (முதலில், உயர்சாதியில் க்ரீமி லேயரை அகற்ற வேண்டும் என்று!) வரிந்து கட்டுவதை மட்டும் "முதலைக் கண்ணீர்" என்று கூறாமல் வேறெப்படி அழைப்பது ???????

9. தாழ்த்தப்பட்டவர்களின் (SC/ST) இடஒதுக்கீட்டுக்கு சுப்ரீம் கோர்ட் தடை எதுவும் விதிக்காத சூழலில், அவர்களையும், (பிற்படுத்தப்பட்டவரில் பொருளாதாரத்தில் பின் தங்கியவர்களையும்), தங்கள் போராட்டத்தில் தந்திரமாகச் சேர்த்துக் கொள்ளும் OBC க்ரீமி லேயர் கூட்டம், கிராமத்து டீக்கடைகளில் இரட்டை டம்ளர், கிராமத்துப் பள்ளிகளில் இரட்டைப் பானை போன்ற நடைமுறைகள் இன்றும் விடாமல் கடைபிடிக்கப்படுவதை அதிகம் கண்டு கொள்ளாமல், அவற்றை மாற்ற ஒரு துரும்பையும் கிள்ளிப் போடாமல், 2000 வருடத்து புளித்த மாவை மீண்டும் மீண்டும் அரைத்துக் கொண்டும், பார்ப்பனரே மறந்து போய் விட்ட மனு தர்மத்தின் பயனற்ற (useless) கூறுகளை ஆராய்ந்து கொண்டும் வெட்டி வம்படிப்பது, உச்சபட்ச காமெடி, மன்னிக்கவும், டிராஜிடி என்றே உரக்கச் சொல்லத் தோன்றுகிறது.

By --- எ.அ.பாலா

*** 326 ***

சுகுணா விலாஸ்- ஸ்பெஷல் பெ(ஸ)ரட்டு - By கி.அ.அ.அனானி

நம்ம கி.அ.அ.அனானி அய்யா(!) எந்தப் பதிவையோ பார்த்து impress(!) ஆகி, நேற்று ஒரு மேட்டரை மெயிலில் அனுப்பினார். படிக்க ஆரம்பிச்சா, நான் நினைக்கிற 'பதிவுக்கும்', கி.அ.அ.அ அனுப்பின மேட்டருக்கும் சம்பந்தம் இருக்கற மாதிரி தெரியலே, ஒரு எழவும் வெளங்காம, அவரது மேட்டர முழுக்க படிச்சுப் பார்த்தவுடன் நம்ம சிற்றறிவுக்கு கி.அ.அ.அனானி உட்ட 'சூப்பர் பஞ்ச்' வெளங்கிச்சு :)

சுகுணா விலாஸில் எல்லா ஐட்டமுமே சுவையா இருக்கும்;-)

கி.அ.அ.அ மேட்டர் பதிவாகக் கீழே, என்சாய் :)

***********************************************************************

நேற்றிறவு 8.00 மணிக்கு KTV-யின் 'நான் ஸ்டாப்' கொண்டாட்டம் "சூப்பர் ஹிட்" இரவுக்காட்சியில் சத்தியராஜ் நடித்திருந்த "வீரப்பதக்கம் " தமிழ் சினிமா பார்த்தேன்.டைட்டில் போடும் போது ஏதோ தொலைபேசி அழைப்பு வந்துவிட்ட படியானல் யார் இயக்கிய படம் என்றெல்லாம் பார்க்கவில்லை . தயாரிப்பு ராமனாதனாம்.

சரி கதைக்கு வருவோம்.

சத்திய ராஜ் படத்தில் "கலிவரதன்" . தாழ்த்தப் பட்ட சாதியில் பிறந்தவர் ( அவரே சொன்ன டயலாக்குதாங்க..ஏதோ நான் கண்டு புடுச்சு எழுதலை)அப்பா வினுசக்கரவர்த்தி அவரை வீரனாக வளர்க்கிறார் என டைடில் சாங்கிலேயே காட்டி முடித்து விடுகிறார்கள்,,,கலிவரதன் மாநிலத்திலேயே முதலாவதாக, (பயிற்சி போட்டிகளில்) தேர்வு பெற்று " கான்ஸ் கலியாக" ஆகி விடுகிறார். அதாங்க கான்ஸ்டபிள் கலிவரதனின் சுருக்கமாம்..வேலைக்கு சேர்ந்த முதல் நாளே அந்த துறைக்கான நெளிவு சுளிவுகளை தெரிந்து கொண்டு பொறுப்பாக சப் இன்ஸ்பெச்டர் வீட்டுக்கு தண்ணீர் சுமந்து , காய்கறி வாங்கிக் கொடுத்து, கூடுதல் பூண்டு தட்டிப் போட்ட மசால் வடையுடன் டீ வாங்கிக் கொடுத்து சப் இன்ஸ்பெக்டர் மற்றும் அவரது மனைவியின் மனம் கவர்ந்த "கான்ஸ்" ஆகிறார். சப்-இன்ஸ்பெக்டரின் மனைவியை இவர் "அண்ணி" என்றும் அவர் இவரை " கொழுந்தனாரே " என்றும் கூட கூப்பிட்டுக் கொள்கிறார்கள்.
எப்பொழுதும் தனது முன்னேற்றம் ( குறுக்கு சந்தில் புகுந்தாவது) பற்றியே சிந்திக்கும் "கான்ஸ்" கலிவரதன் அதற்காக தன்னையே நினைத்துக் கொண்டிருக்கும் மாமன் பெண் ராதிகாவை கூட மணக்க மறுத்து விடுகிறார்.மனம் நொந்த ராதிகா தந்தை பேச்சு தட்டாமல் மில்லில் வேலை பார்க்கும் தொழிளாளி கம் நேர்மையான யூனியன் லீடர் "நிழல்கள் ரவியை" மணந்து இரண்டு குழந்தைகளையும் பெற்றெடுக்கிறார்.

சரியாக மேடையில் பேசக்கூட தெரியாத மந்திரி மகள் "ஊர்வசி" எம் எல் ஏ எலெக்க்ஷனில் (இடைத்தேர்தலாகத்தான் இருக்க வேண்டும்) நிற்க அவருக்கு எப்படி பேசி மக்களை கவர வேண்டும் என்று "கான்ஸ் கலி"யான சத்தியராஜ் லெட்டெரெல்லாம் போடுகிறார்.அதைப் படிக்கும் ஊர்வசி அப்புறம் மேடையில் பேசுவதே இல்லை ..அதனால் அந்த அறிவுறையை என்ன செய்தார் என்று இன்னும் எனக்கு புரிந்தபாடில்லை :)))

இது இப்படியிருக்க பிரபல கேடி ரகுவரனை ( "வல்கனைசிங்" வடிவேலுவோ ஏதோ பெயர் ...ஞாபகமில்லை ) பிடிக்க போலிஸ் அரஸ்ட் வாரண்ட் இருக்க சப் இன்ஸ்பெக்டருக்கு அதைப் பற்றி பேசும் போதே கை காலெல்லாம் ஆட்டம் காண்கிறது...மெய்யாலுமே அப்படிக் காட்டுகிறார்கள்..பிலிவ் மீ..எந்த போலிஸ¤ம் ரகுவரனை பிடித்து வர தயாராக இல்லாத நிலையில் " நாம் பிடித்து வந்து நல்ல பெயர் வாங்கலாம்" என முடிவு கட்டி நம்ம சத்தியராஜ் அங்கு போகிறார்.... அப்போது ஊர்வசியின் அப்பா அமைச்சர் அங்கு வந்து ரகுவரனிடம் மார்கெட் ப்ளேஸில் தனியாக பேச வேண்டும் என்று சொல்ல, ரகுவரன் ஒரு சவுண்டு விட, மார்கெட் ப்ளேஸ் போட்டது போட்டபடி காலியாகிறது...சத்தியராஜை தவிர.
இப்போது அமைச்சரும் ரவுடி ரகுவரனும் தனியாக பேசுவதை சத்தியராஜும் கூட இருந்து கேட்கிறார்..அதாகப்பட்டது அமைச்சர் மகள் ஊர்வசி எம் எல் ஏ எலெக்ஷன்ல நிக்குறார் இல்லையா ...அந்த எலெக்ஷன்ல எதிர்கட்சி சார்பா நிக்குற ஆளை எதிர்க் கட்சியே போட்டுத்தள்ள ப்ளான் போட்டிருக்காம்.. " அதுனால எலெக்ஷன் கான்சலானால் அமைச்சர் மகள் ஜெயிக்க முடியாதுல்ல " அதுனால எதிர் கட்சி வேட்பாளருக்கு பாதுகாப்பு கொடுக்க சொல்லி ரகுவரன் கிட்ட அமைச்சர் கேட்கிறார்..அதுக்கு ரகுவரன் எனக்கு இன்னா...என்று கேட்டு ...அப்புறம் நானும் பாலிடிக்க்ஷ¤க்கு வரணும் அதுனால வட்ட செயலாளர் போஸ்டு வேணும் என்று கேட்க நம்ம "கான்ஸ்" சத்தியராஜ் "இந்த "மாஸ்டர் ப்ளான் " ?! ஒர்க் அவுட் ஆகணுமின்னா நானு இப்ப ரகுவரனை அரஸ்டு பண்னக் கூடாது...அதுக்கு எனக்கு இன்ஸ்பெக்டர் போஸ்ட் வேணும் என்று பேரம் பேசுகிறார். ப்ளான் சக்ஸசாகாதோ என்று பயந்து நடுங்கி அமைச்சரும் வாக்கு கொடுக்கிறார். எலக்க்ஷன் முடிந்து ஊர்வசி ---எம் எல் ஏ, ரகுவரன் ---வட்ட செயலாளர் & சத்தியராஜ்---இன்ஸ்பெச்டராகிறார்கள்.

தான் கான்ஸ் ஆக இருந்த ஸ்டேசனிலேயே இன்ஸ்பெக்டராகும் சத்தியராஜ் முன்னாளில் தான் பணிவிடை செய்த (இன்னும் அப்படியே) சப்இன்ஸ்பெக்டராக இருப்பவரை மற்றும் அவர் மனைவியை ஏக வசனத்தில் பேசி அதட்டி உருட்டுகிறார்..

இப்படியாக இருக்கும் போது மார்கெட் பிளேசில் ஒரு கொலை நடப்பதாக தகவல்..அதை விசாரிக்க போகும் போலிஸ் திரு திரு வென்று விழித்துக் கொண்டிருக்க "புத்திசாலி" சத்திய ராஜ் அங்குள்ள ஒரு வாட்ச் மேனிடம் விசாரித்து அவர் சொன்ன " கொலை செய்தவன் வெள்ளை சட்டை, வெள்ளை வேட்டி கட்டி குங்குமம் வீபுதியெல்லாம் வைத்திருப்பான் " என்ற பிரத்தியேக அடையாளங்களை வைத்து கொலையாளியை ஒரே நொடியில் (பக்கத்திலிருக்கும் போலிஸிடம் கேட்டு )கண்டு பிடித்து கொலைக்கான காரணத்தையும் ஊகித்து நேரே மந்திரி, ரகுவரன் & கோவிடம் போய் அரஸ்ட் வாரண்ட்டை ஆட்டுகிறார்..அதாவது ஏழு மில்களின் பங்குகளை சுருட்ட 24 வயதே நிரம்பிய அந்த மில்லின் உரிமையாளரை ஆள் செட் பண்ணி போட்டுத் தள்ளி விடுகிறார்களாம்..அதை தன் மதியால் கண்டு பிடித்த சத்தியராஜ் இப்போது பேரம் பேசி " டி எஸ் பி " ஆகி விடுகிறார்.

இப்படி அபகரித்த மில்லில் ஸ்ட்ரைக் நடக்கிறது..யூ ஆர் ரைட்...நிழல்கள் ரவி தலைமையில்..இதை அடக்க முடியாமல் நிர்வாகம் தடுமாறி டி எஸ் பி சத்தியராஜிடம் யோசனை கேட்க அவர் யோசனையும் சொல்லி பரிசாக கேட்பது மந்திரி மகள் " மந்திரி ஊர்வசியை" (மனைவியாக).மந்திரியும் ஒத்துக் கொள்கிறார்.சத்தியராஜ் தனது யோசனையை மந்திரி & கோவிற்கு கதை வழியாக விளக்குகிறார்..அதாவது திருவிழாவில் குழந்தை எனக்கு மிட்டாய் வேணும் பொம்மை வேணும் என்று அடம் பிடிக்குமாம்..அதே குழந்தை அம்மாவை விட்டு மிஸ்ஸாகி விட்டால் யார் எதை வாங்கித் தருகிறேன் என்று சொன்னாலும் எனக்கு அதெல்லாம் வேண்டாம் அம்மாதான் வேண்டும் என்று கேட்குமாம்..அது மாதிரி மில்லை இழுத்து மூடினால் தொழிலாளர்கள் எங்களுக்கு போனஸ் வேண்டாம், சம்பள உயர்வு வேண்டாம்..வேலை இருந்தால் போதும் என்று சொல்லி விடுவார்களாம் " அதன் படியே மில்லை மூட தர்ணா செய்யும் தொழிலாளர்கள் மீது லத்தி சார்ஜ், ஷ¥ட்டிங் ஆர்டெரெல்லாம் கொடுக்க " யூ ஆர் அகைன் டெட் ரைட் ஜென்டில் மென் " அதில் இறப்பது நிழல்கள் ரவி.... ராதிகா கழுத்திலிருந்து தாலி இறங்க ஊர்வசி கழுத்தில் தாலி ஏறுகிறது ( சத்தியராஜ் கட்டுகிறார்) !!!!!!!!

என்ன மக்களே...ரெஸ்ட் வேணுமா இன்னும் பாதிக் கதை கூட முடியலை... அதுக்குள்ளேயேவா..

யாருக்காவது இந்தக் கதையின் தொடர்ச்சி மற்றும் முடிவு பற்றி மண்டைக் குடைச்சல் , ஆர்வக் கோளாரால் நெஞ்சு எரிச்சல் ஏற்பட்டால் பின்னூட்டம் வாயிலாக தெரியப் படுத்தவும் ...அடுத்த பதிவில் சொல்லத் தயார்.ஆனால் அதனால் ஏற்படும் மன உளைச்சலுக்கும் இன்ன பிற கேடுகளுக்கும் (ரத்த அழுத்தம், மலச்சிக்கல் ...) நான் பொறுப்பேற்க முடியாது.

பின் குறிப்பு : என்ன மக்கா, தலைப்புக்கும் பதிவுக்கும் சம்பந்தமில்லையின்னு பாக்குறீங்களா :)

"சிலரின், அதி புத்திசாலித்தனமானதாக (அவர்களே!) நினைத்துக் கொண்டு எழுதப்படும், உளறல் மற்றும் காழ்ப்புணர்வு 'மிதக்கும்' பதிவுகளை படிப்பதை விட "வீரப்பதக்கம்" போன்ற படம் பார்ப்பது எவ்வளவோ மேல்" என்ற என் கருத்தை ஸ்டாரங்காகப் பதிய மட்டுமே இந்தப் பதிவு. நேரடியாக பதில் சொல்லியோ, நான் குறிப்பிடும் "பதிவுக்கு" லிங்க் எல்லாம் குடுத்தோ உங்கள் நேரத்தை மேலும் வீணடிக்கப் போவதில்லை..

கி.அ.அ.அனானி

************************************

கி.அ.அ.அ மனசில யாரு, அவருக்கு என்ன பேரு ?????

(இது எ.அ.பாலாவோட மனதில் எழுந்த கேள்வி :)))))))) கண்டுபிடிக்கிறவங்க நிச்சயம் கிராண்ட் மாஸ்டர் தான் ;-)
*** 325 ***

324. வருடாந்திர Appraisal - மேலாளர்களுக்கு குறிப்புகள் - பாகம் 2

பாகம் ஒன்றை வாசித்து விட்டுத் தொடரவும். சென்ற பதிவில் அப்ரைசல் பற்றி 5 குறிப்புகளை அளித்திருந்தேன். ஆறாவதிலிருந்து தொடர்கிறேன்!

6. Setting Goals (to the appraisee) என்பது, (அந்த இலக்குகளை முன்னிறுத்தும் மேலாளர்) எத்தகைய தொலை நோக்கோடு இருத்தல் அவசியம் என்பதற்கு ஒரு சூப்பர் உதாரணத்தை அந்த பயிற்சியாளர் தந்தார்.

அமெரிக்காவில் ஒரு பழமையான பல்கலைக்கழகக் கட்டடம் (எந்த மாகாணம் என்று ஞாபகமில்லை!) கட்டப்பட்ட சமயத்தில், கட்டடப் பொறியாளர் தூண்(column), குறுக்குச் சட்டம்(beam) போன்றவற்றை வலிமையான மரத்தால் (ஒரு வகை டிம்பர்) அமைத்திருந்தார். ஒரு இருநூறு ஆண்டுகள் ஆன பின், கட்டடத்தின் ஸ்திரத்தன்மையை சோதிக்க நிபுணர் குழு ஒன்று கூட்டப்பட்டது. பழமையான ப்ளூ பிரிண்ட் அறையில் இருந்த கட்டடத்தின் வரைபடங்களை ஆராய்ந்த நிபுணர்கள், ஒரு பெரிய வரைபடத்தின் ஓரத்தில், சின்ன மேப் ஒன்று இணைக்கப்பட்டு, பல்கலைக்கழகத்தின் அருகில் இருந்த வனத்திலுள்ள ஓர் இடம் அந்த மேப்பில் குறிக்கப்பட்டிருந்ததைப் பார்த்து, 'என்ன இது' என்று வியப்படைந்தனர்.

பல்கலைக்கழகத்தின் மெயின் ஹாலில் அமைக்கப்பட்டிருந்த, பெரிய அளவிலான, மரத்தாலான, ஒரு குறுக்குச் சட்டம் சற்றே தளர்ச்சியடைந்து விட்டதால், அதைக் கட்டாயம் மாற்றியாக வேண்டும் என்பது நிபுணர் குழுவின் முக்கியப் பரிந்துரை. மேலும், சிலபல மாற்றங்களையும் பரிந்துரைத்தது. மேப்பில் குறிப்பிடப்பட்டிருந்த வனப்பகுதிக்கு சென்ற நிபுணர் குழுவினர், அங்கு சீரான வரிசையில், பிரம்மாண்டமாக வளர்ந்திருந்த மரங்களைக் கண்டனர். பல்கலைக்கழகத்தில் மரவேலைக்கு முன்னர் பயன்படுத்தப்பட்ட அதே வகை (வலிமை வாய்ந்த) மரங்கள் அவை என்று அறிந்து நிபுணர்கள் ஆச்சரியமடைந்தனர்.

அதாவது, 200 ஆண்டுகளுக்கு முன் பல்கலைக்கழகம் கட்டப்பட்ட சமயத்திலேயே, தொலைநோக்குப் பார்வையோடு, அந்த கட்டடப் பொறியாளர், அப்போது மரவேலைக்குப் பயன்படுத்தப்பட்ட மரத்தின் விதைகளை அருகிலுள்ள வனத்தில் வரிசையாக விதைத்திருந்தார். அவை நிபுணர் குழு முன்னால், விருட்சங்களாகக் காட்சியளித்தன.

பல ஆண்டுகளுக்குப் பின், கட்டடத்தின் ஸ்திரத்தன்மைக்கு அத்தியாவசியமான columns, beams ஆகியவற்றை மாற்ற வேண்டிய தேவை ஏற்படும் என்பதை அவர் உணர்ந்து செயல்பட்டதால்,பல்கலைக்கழக கட்டடத்தை, அதன் புராதனத்தன்மை குன்றா வண்ணம், அதே வகை மரம் கொண்டு அழகாக சீரமைக்க முடிந்தது.

7. ஒரு மேலாளர், தனக்கு மேலேயும் ஒரு மேலாளர் உள்ளார் (அதாவது தனக்கு மேலே hierarchy, authority உள்ளன!)என்பதை தான் மதிப்பீடு செய்யும் நபருக்கு subtle-ஆக உணர்த்துவதில் தான் மேலாளரின் திறமை அடங்கியிருக்கிறது.

8. அடுத்து, Objectiveness என்றால் என்ன என்பது குறித்த தெளிவுக்கு, நடந்த சம்பவம் ஒன்றை பயிற்சியாளர் நினைவு கூர்ந்தார். அவர் வேலை செய்த நிறுவனம் ஒன்றில், மார்க்கெட்டிங் அணியில் அவருடன் பணி புரிந்த ஒருவரை, முதலில் கம்பெனி மேலாளர் அப்ரைசல் செய்து, சிலாக்கியமாக எதுவும் கூறாமல், கடுமையான உழைப்பாளியான, நேர்மையான, அந்த நபரை மூட்அவுட் செய்து அனுப்பி விட்டார். ஏதோ பிரச்சினை என்பதை உணர்ந்த நம் பயிற்சியாளர், "நான் வேண்டுமானால் அவரிடம் பேசிப் பார்க்கட்டுமா?" என்று மேலாளரிடம் கேட்டு விட்டு, அந்த நபருடன் மனம் விட்டுப் பேசியதில், அந்த நபர் கிராமத்துச் சூழலிலிருந்து வந்ததும், தன்னம்பிக்கை மற்றும் நுனி நாக்கு ஆங்கிலப்புலமை சற்றே குறைந்தவராக இருந்தும், தனது கடின உழைப்பால், அந்த நபருக்கு வழங்கப்பட்ட வருடாந்திர டார்கெட்டில் (TARGET) 80% இலக்கை அடைந்து விட்டதும், பயிற்சியாளருக்குப் புரிந்தது. பயிற்சியாளரோ, கொடுத்த டார்கெட்டுக்கு மேலே achieve செய்தவர். இருந்தாலும், அந்த நபரின் அருமை பயிற்சியாளருக்கு விளங்கியது!!!

இதற்கு பயிற்சியாளர் ஒரு மேற்கோள் காட்டினார். அதாவது, ஒரு பரம ஏழை தன்னிடம் இருந்த ஒரே நூறு ரூபாய் நோட்டை, சுனாமியால் பாதிக்கப்பட்டவர்களின் உதவி நிதிக்காக வழங்குவதையும், ஒரு பெரும் பணக்காரர் அதே நிதிக்கு 10 லட்ச ரூபாய் தருவதையும் சுட்டிக் காட்டி, "யார் கொடை பெரியது ? இவர்கள் இருவரில் யார் சிறந்தவர் என்று கூறுவீர்கள்?" என்று வினாவெழுப்பிய பயிற்சியாளர், objectiveness என்பதை நாங்களாகவே உணருமாறு செய்தார்!

9. அப்ரைசலின் திருவாசகம் ஒன்றை பயிற்சியாளர் கூறினார்:An appraiser has a responsibility in the performance of the appraisee! இதற்கு மேலாளர் செய்ய வேண்டியதெல்லாம், தனக்குக் கீழே பணி புரியும் நபருக்கு "நீட்டப்பட்ட இலக்கு"களை (Stretch Goals) அளிப்பது தான் சிறந்த வழி. அதன் மூலம், அப்ரைசரான மேலாளர், தனது பொறுப்பான ஆதரவை (responsible support) அந்த நபருக்கு அளிக்க வேண்டிய நிலைக்கு தள்ளப்படுகிறார், இல்லையா ? அந்த நபரின் performance-இல் மேலாளருக்கு ஒரு பொறுப்பு உண்டாகிறது! சம்பந்தப்பட்ட நபரும் தனது comfort வட்டத்திலிருந்து வெளிவந்து, courage வட்டத்தில் செயல்படத் தொடங்குவதால், இம்முறை எல்லார்க்கும் பயன் தருவதாக அமைந்து விடுகிறது!

10. மேற்கூறியதை விளக்க, ஒரு கழுகுக் குஞ்சானது பிறந்து, வளர்ந்து, பறக்கத் தொடங்கும் வரை, அதன் பெற்றோர் கடைபிடிக்கும் வழிமுறையை (process of bringing-up) பயிற்சியாளர் மேற்கோள் காட்டினார்.

அதாவது, அந்த கழுகுக் குஞ்சின் பெற்றோர், ஆரம்பத்தில் சின்னக் கழுகிற்கு மலை உச்சியில் சொகுசான கூடு கட்டி, இரை எடுத்து வந்து தந்து, அதை ஆபத்திலிருந்து காத்து, அதன் பயத்தை போக்கி ஆதரவாக இருந்து, அக்குஞ்சை comfort வட்டத்தில் வைத்திருக்கும்.

சிறிது காலத்திற்குப் பின், கூட்டைக் சிறிது சிறிதாகக் கலைத்து, குளிரிலும், வெயிலிலும் (சின்னக்கழுகை) கஷ்டப்பட வைத்து, அதை உணவுக்கு அலைபாய வைத்து, அதை பறக்க வைக்க மலை உச்சியிலிருந்து அடிக்கடி தள்ளி இம்சை பண்ணி, அது படபடவென இறக்கைகளை அடித்து அல்லாடி தரையில் மோத இருக்கும் சமயத்தில் அதைக் காப்பாற்றி, பெற்றோர் துணை இல்லா உலகில் தனித்து வாழ சின்னக் கழுகை தயார்படுத்த வேண்டி, அதை courage வட்டத்திற்கு அதன் பெற்றோர் தள்ளி விடுகின்றன.

இம்மாதிரி அந்த கழுகின் பெற்றோர் போல் ஒரு மேலாளர் நடத்தல் அவசியமாகிறது.

11. தனக்குக் கீழே பணி புரியும் அனைவரும் ஒரே மாதிரி இருக்க மாட்டார்கள் என்ற மிகச் சாதாரண விஷயத்தை ஒரு மேலாளர் தன் மனதில் திடமாகக் கொள்வதும் அவசியமாகிறது. இதைக் கூட சில மேலாளர்கள் புரிந்து கொள்வதில்லை!!! ஒருவரை, அணியில் இருக்கும் இன்னொருவருடன் கம்பேர் (compare) செய்யவே கூடாது.

சீனாவில் உள்ள ஒரு வகை மூங்கில், முதல் 5-6 வருடங்கள் அதிக வளர்ச்சியின்றி இருந்து, அடுத்த 5-6 வாரங்களில் அசுர வளர்ச்சி (90 அடி உயரம்!) அடைகிறது. அது போலவே, பணியாளர்களில் சிலர், பணியைக் கற்றுக் கொள்ள சற்று அதிக காலம் எடுத்துக் கொண்டாலும் (Learn it slow but good!), பின்னாளில் பணி புரியும் நிறுவனத்துக்கு மிக்க பயனுள்ளவர்களாகத் திகழக் கூடிய சாத்தியம் உள்ளது என்பதை புரிந்து கொள்ளும் அளவுக்கு ஒரு மேலாளருக்கு தொலை நோக்கு அறிவு வேண்டும்!

12. ஒரு நிறுவனத்தின் எதிர்பார்ப்புகள் (organizational expectations) போலவே, தனி நபரின் இலக்குகளும் (individual aspirations) முக்கியமானவை என்று ஒரு அப்ரைசர் (மேலாளர்) உணர்வதும், அதற்கேற்ற வண்ணம் செயல்படுவதும், அவரின் முக்கியமான கடமைகளில் ஒன்றாகும்.

13. பணி புரியும் இடம் என்பது, ஒரு கல்லூரி வளாகத்திற்கு ஈடாகவும், பிசினஸ் என்பது பாடத்திட்டத்திற்கு (curriculum) ஒப்பாகவும், மேலாளர்கள்/பிராஜெக்ட் லீட் என்பவர்கள் ஆசிரியர்களுக்கு நிகராகவும் அமையும் நிறுவனம் நிச்சயம் வெற்றி பெறும் என்பது நிதர்சனம். மேற்கூறிய மூன்றும், கஸ்டமர்களும் நிறுவனம் என்ற கட்டடத்தின் 4 தூண்களாக விளங்குகிறார்கள். இக்கட்டடத்தின் அடித்தளம் (foundation)பணியாளர்களால் (employees) அமைக்கப்படுகிறது! அதன் மேற்கூரை, தொழில்நுட்பத்தால் உருவாக்கப்படுகிறது, அதாவது, Technology is the Enabler! இம்மாதிரியான ஒரு நற்சூழல் வாய்க்கப்பெற்ற ஒரு நிறுவனத்தில், மேலாளர்களுக்கும், பணியாளர்களுக்கும் இடையேயான நல்லுறவும் பலம் பெறுகிறது.

14. அடுத்து அப்ரைசலின் இரண்டு முக்கியக் கோட்பாடுகள்!
(i) During the appraisal, you COMMUNICATE, not SPEAK!
(ii) NEVER postpone the appraisal discussion and NEVER allow
interruptions during the appraisal session!

என்ன, கிளாஸ் எடுத்து ரொம்பவே போரடிச்சுட்டேனா ????? பொறுமையாக வாசித்தமைக்கு நன்றிகள் பல!

என்றென்றும் அன்புடன்
பாலா

*** 324 ***

323. வருடாந்திர Appraisal - மேலாளர்களுக்கு குறிப்புகள் - பாகம் 1

நேற்று அப்ரைசல் பற்றிய ஒரு பயிற்சி வகுப்பில் கலந்து கொண்டேன். பொதுவாக, இது போன்றவை, கொஞ்ச நேரத்திலேயே எனக்கு போரடிக்கத் தொடங்கி விடும். பயிற்சியாளர் திறமை மிக்கவராக / நல்ல பேச்சாளராக இருந்த காரணத்தால், மூன்று மணி நேரம் போனதே தெரியவில்லை. வகுப்பு நல்ல interactive ஆக இருந்தது. தான் முன் வைத்த பாயிண்ட்டுகளை விளக்க அவர் கூறிய குட்டிக் கதைகளும், மேற்கோள் காட்டிய உதாரணங்களும் சுவையாக இருந்தன. அதிலிருந்து சில குறிப்புகளை இப்பதிவில் தருகிறேன்.

1. நமக்குக் கீழே பணி புரியும் ஒரு மென்பொருளாளரை மதிப்பிடுவது அல்ல அப்ரைசல், அவரது கடந்த வருட பணி குறித்த மதிப்பீடே அப்ரைசல் என்பதற்கு பல மேலாளர்கள் முக்கியத்துவம் தருவதில்லை. அவரது அந்த ஆண்டு performance-ஐ, அந்த நபர், அவருக்கு அளிக்கப்பட்ட பணியை, நேர்மையாக, அவரது திறமைக்கு ஏற்ற வகையில் செய்தாரா (to the best of his/her abilities) என்ற அளவில் மதிப்பிடுவது அவசியமாகிறது. மேலாலர், தன்னை, தான் மதிப்பீடு செய்யும் நபரின் இடத்தில் பொருத்திப் பார்த்து முடிவெடுப்பதும் அவசியமாகிறது. இதற்கு ஒரு மேற்கொள்:

தங்க நகைகள் செய்யும் ஆச்சாரி, தங்கத்தை சுத்தப்படுத்த, அதை நெருப்பிலிட்டு உருக்கி, அதிலிருந்து மாசுகளை நீக்குவதை நாம் பார்த்திருப்போம். தங்கத்தை நெருப்பிலிடும்போது, எந்த நிலையில், அத்தங்கம் மாசற்ற தன்மையை (purified state) அடைகிறது என்பதை கண்டுபிடிக்க அந்தக் காலத்து ஆச்சாரி ஒரு டெக்னிக் வைத்திருந்தார். அதாவது, உருக்கப்பட்ட தங்கத் துளியில், ஆச்சாரியின் முகம் துல்லியமாகத் தெரியும்போது, அத்தங்கமானது (நகைகள் செய்வதற்கு ஏற்ற வகையில்) மாசற்ற நிலையை அடைகிறது என்பது ஆச்சாரி அனுபவத்தில் கண்ட உண்மை. இது நம்ம அப்ரைசலுக்கும் பொருந்தும்.

2. அப்ரைசலின்போது, மதிப்பீடு செய்யப்படும் நபரின் பழைய அனுபவ திறமையை வைத்து அல்லது புறத்தோற்றத்தை வைத்து அவரை மதிப்பிடுதல் புத்திசாலித்தனமான விஷயம் அல்ல என்பதற்கு ஒரு அழகான மேற்கோள் காட்டி, அந்த பயிற்சியாளர் விளக்கினார்.

ஒருவர் சந்தைக்கு மாடு வாங்கச் சென்றார். அங்கு விற்பனைக்காக, இருந்ததிலேயே வலிமையான, ஒரு எருதை கண்டவுடன், அதை விற்க முற்பட்டவரிடம் சென்று (எருதின் பற்களையெல்லாம் சோதித்து விட்டு) விலை கேட்டார். குறைந்த விலை என்று பட்டவுடன், உடனே அதை வாங்கி, ஓட்டிச் சென்றார்.

பார்க்க திடகாத்திரமாக இருந்த அந்த எருதானது, ஒரு 30 அடி நடந்தவுடன் நின்று விட்டது. சற்று ரெஸ்ட் எடுத்து விட்டு, மீண்டும் 30 அடி நடை, ஓய்வு, மீண்டும் 30 அடி நடை, ஓய்வு, என்று அதை விலை கொடுத்து வாங்கியவரை பேஜார் பண்ண ஆரம்பித்தது. கடுப்பான அம்மனிதர், மீண்டும் சந்தைக்குச் சென்று, அதை விற்றவரிடம், அவர் தன்னை ஏமாற்றி விட்டதாக குற்றம் சாட்ட, விற்றவரோ, "ஐயா, அந்த எருது, மாநகராட்சி குப்பை வண்டியை இழுக்க பயன்படுத்தப்பட்டது, அதனால் தான் அந்த நினைப்பிலேயே இப்படிச் செய்கிறது. போகப் போக சரியாகி விடும்!" என்று கூறினாராம் :)

3. பணி புரியும் இடம் (office) என்பது மனதுக்கு சந்தோஷத்தையும், உத்வேகத்தையும் தரும் வகையில் அமைதல் அவசியம், ஆனால், பெரும்பான்மை அவ்வாறு அமைவதில்லை என்பதை ஒரு statistics கொண்டு வேடிக்கையாக விவரித்தார்.

ஆசியாவிலேயே சிறந்ததாகக் கருதப்படும் நாராயண ஹிருதயாலயா என்ற மருத்துவமனை ஓர் ஆய்வு நடத்தியதில், அந்த மருத்துவமனைக்கு எடுத்து வரப்படும் இதய நோய் சம்பந்தப்பட்டவர்களில் பெரும்பான்மையினர், திங்கள் கிழமை தான் ஹார்ட் அட்டாக்குக்கு உள்ளாகின்றனர் என்பது கண்டுபிடிக்கப்பட்டது! அதாவது, வார விடுமுறைக்குப் பின், பலரும் பணிக்குத் திரும்பும் நாள் திங்கள் தானே :) அன்று, வொர்க் பிரஷர் பொதுவாக சற்று அதிகமாக இருத்தல் இயல்பானது தானே!

Children generally walk to school, but run back home என்று ஆங்கிலத்தில் கூறப்படுவது, குழந்தைகளுக்கு வீட்டின் மேல், பெற்றோர் மேல் உள்ள வாஞ்சையும், நாட்டமும் பள்ளியில் பால் இருப்பதில்லை என்பதை உணர்த்துகிறது!

4. Empowerment என்பது மிகத் தவறாக புரிந்து கொள்ளப்படும் வார்த்தை என்று அந்த பயிற்சியாளர் கூறினார். அதாவது, பொதுவாக எண்ணப்படுவது போல, ஒருவருக்கு பொறுப்புகளும், அதிகாரமும் (responsibility and authority) வழங்கி அவரை empower செய்ய முடியாது! அந்த நபரது அறிவு, ஆற்றல், அனுபவம் சார்ந்த சுயபலத்தை அவர் உணரும்படி செய்வதும், அவரது சுய ஊக்கத்தை வெளிவரச் செய்வதுமே Empowerment எனப்படும் என்று நச்சென்று கூறினார்.

5. Hewlett Packard (HP) நிறுவனத்தின் motto வாசகங்களில் ஒன்று, சற்று விசித்திரமாக இருந்தாலும், empowerment-ஐப் பற்றிப் பேசும்போது, அதன் தாக்கத்தை புரிந்து கொள்ள முடிகிறது.
Every Employee has the RIGHT to committ a mistake!
அதாவது, ஒரு பணியாளர் தனது comfort வட்டத்திலிருந்து, courage வட்டத்திற்குச் செல்ல, இந்த 'தவறு செய்வதற்கான அனுமதி' அவசியமாகிறது :) அவரது பணிசார் (career) வளர்ச்சிக்கும் அது பெரிதளவில் உதவுகிறது!

ஒரு பணியாளரை அப்ரைசல் செய்யும்போது, பொதுவாக, அவரது வெற்றிகள், comfort வட்டத்திலும், அவரது தோல்விகள் (என்று மேலாளர் கருதுவது) courage வட்டத்திலும் பெரும்பாலும் அமைகின்றன. ஒரு மேலாளர், அப்ரைசலின் போது இதை மனதில் கொண்டு செயல்படுவது அவசியம்!

இந்தக் கட்டுரையை எனது அடுத்த பதிவில் தொடர்கிறேன், வாசித்தமைக்கு நன்றி.

என்றென்றும் அன்புடன்
பாலா

*** 323 ***

322. அனானிக்கு வந்த சந்தேகம் (அ) நான் கி.அ.அ.அனானியா ?

என் முந்தைய பதிவில் ஒரு 'அனானி', ஒரு சந்தேகத்தை, கீழே உள்ள பின்னூட்டம் வாயிலாக வெளியிட்டார். நண்பர் குழலிக்கும் இந்த டவுட் இருப்பதை அவரது பின்னூட்டத்தில் உள்ள ஸ்மைலி உணர்த்தியது :) அதனால் தான் இந்த விளக்கப் பதிவு!
***************************
பாலா,

வேண்டாம் விடுங்க.. உங்களுக்கு இந்த விளையாட்டு சரியா வெளையாட வரலை!

இப்படித்தான் ஒருத்தரு பயங்கர வெவரமா வெளையாடறேன்னுட்டு மனோகர் ஜோஷியாகி பல்லிளித்த
கதையை யாரும் மறக்கலை..

எந்த கருத்தா இருந்தா என்ன? உங்க பேருலயே எழுதுங்களேன்.

சரியான வாதம்/கருத்து வைச்சா நீர்வந்து செயல்ல காட்டி போர்டை கழட்டுவீரா?! அதாவது அந்த
போர்டு ஏன் அங்க இருக்குன்னு உமக்கு தெரியாது. மத்தவங்க கும்மியடிக்காம தெளிவா ஆக்கப்ப்பூர்வமா
எடுத்துச்சொன்னா உடனே நீங்க அந்த உலக உண்மைய புரிஞ்சுண்டு காரியத்துல இறங்கீரூவீர்! ஒரே
தமாசையா உம்மோட... "அவங்களுக்குத்தான் அறிவில்லை. கும்மி அடிக்கறாங்க. நீர் என்னத்த
கழட்டப்போறேன்னு சொல்லலையேன்னு" கேட்டா... மொதல்ல அவனை கக்கா போகச்சொல்லு. அப்பறம் நான் வந்து கழுவறேங்கறீர்! தெளிவா எழுதறதா நெனைச்சுண்டா மட்டும் போறாது. அதைப் வாசிச்சுட்டு மத்தவா கேள்வி கேட்டா பதில் சொல்ல வக்கிருக்கனும்.

// ""ஒண்ணு விட்டா"" நீ அத்திம்பேர் பையனா ?விட்டுட்டா போச்சு :)
//
ஆத்துல சொல்லிக் கொடுக்கலையா? இப்படியெல்லாம் கண்ட இடத்துல விடப்படாது ஓய்! பார்த்து... :)
********************************

கி.அ.அ.அ வின் "ஒண்ணு விட்டா" அத்திம்பேர் பையன் தம்பி,

நீங்க ஒங்களை அடையாளப்படுத்திக் கொள்ளாமல், அனானியா வந்து பிரில்லியண்ட்டா கேள்வி கேட்டிருந்தாலும், எனக்கு இந்த "விளையாட்டு" வரலைன்னு அங்கலாய்த்திருந்தாலும், உங்களுக்கு பதில் சொல்லத் தான் போறேன் :) இனிமேல், கொஞ்சம் 'சின்ன' புனைபெயரில் வந்தால் கூப்பிட வசதியாக இருக்கும் ;-)

தெளிவாச் சொல்றேன், இந்த பதிவை எழுதினது கி.அ.அ.அ. "நான் அவரில்லை". மேலும், 3 வருஷமா இங்க குப்பை கொட்டிக் கொண்டு இருக்கும் எனக்கு, வேறு ஒருவரின் பெயரில் எழுத வேண்டிய அவசியமில்லை! அப்படி செய்ய வேண்டுமென்று விரும்பினால், பார் டெண்டர், இரவுக் கழுகார், வி.சி போல ஒரு வலைப்பதிவு ஆரம்பிச்சு, உஷாரா செய்ற அளவுக்கு எனக்கு(ம்) புத்தி இருக்கு :)

என் பெயரிலேயே நெறைய விவாதங்களில் கலந்து கொண்டு, தீவிரமா கருத்துக்களை முன் வைத்து, சண்டையெல்லாம் போட்டவன் தான் நான்! கேட்டுப் பாருங்க ! எதுக்குக் கேட்கணும், ஒங்களுக்கே தெரியுமே :) மேலும், பாலபாரதி, லக்கிலுக் மற்றும் திருவிடம் ஒரு விஷயத்தை நேரடியாக எடுத்துச் சொல்ல எனக்கு என்ன பயம் வேண்டிக் கிடக்கு, இன்னொருத்தர் பேர்ல சொல்ற அளவுக்கு !!!! லாஜிக் உதைக்குதே, தம்பி :)

உங்க (மற்றும் இன்ன பிறரின்!) தெளிவுக்காகச் சொல்றேன், கி.அ.அ.அ அனுப்பற மேட்டர்ல சற்று காட்டமா இருக்குற சிலவற்றை எடிட் செய்து விட்டுத் தான் பதிப்பிக்கிறேன். என் வலைப்பதிவில் இடப்படுபவை should follow certain guidelines, I have set !

மேலும், கி.அ.அ.அ போல எனக்கு எழுத வராது !!!!! அவர் எழுத்துக்களை சுவீகரித்துக் கொள்ளும் அல்ப ஆசையும் எனக்கில்லை. அதன் மூலம், பிரபலம் அடைய வேண்டிய அவசியமுமில்லை. In fact, கி.அ.அ.அனானியிடம், ஒரு வலைப்பதிவு தொடங்குமாறு ஆரம்பத்திலேயே ஒரு மெயிலில் கூறியிருந்தேன். அவர் அதற்கு பதில் கூறவில்லை.

இன்னொரு விஷயம். எனது முந்தைய பதிவுக்கு (ஒரே நாளில்) 500 ஹிட்ஸ், கி.அ.அ.அ வின் தயவில் ! நான் எழுதும் பதிவுக்கு நார்மலா, 150-200 ஹிட்ஸ் தான் கிடைத்து வருகிறது. அதனால், அவரைப் போல் என்னால் எழுத முடியுமானால், எனக்கு மகிழ்ச்சியே :) Unfortunately, கி.அ.அ.அனானி, மாதத்திற்கு 1 அல்லது 2 மேட்டர் தான் மெயிலில் அனுப்புகிறார் !

கி.அ.அ.அனானியின் எழுத்து நடைக்கு பலரைப் போல் நானும் ரசிகன் ! நான் கூறியவற்றை நம்பறதும் நம்பாததும் உங்கள் இஷ்டம். இது தான் என் முதல் மற்றும் கடைசி விளக்கம், ஐயம் கொண்ட ஐயாக்களுக்கு ;-)
*****************************
இப்போது "ஒண்ணு விட்டா" அத்திம்பேர் பையன் தம்பி கேட்ட கேள்விக்கு, அதாவது
//
அண்ணே பாலா,

ஜல்லி கும்மி அடிக்கற ஆளுங்களை விடுங்க.

அந்த போர்டு அங்கே இருக்கது உங்களுக்கு ஓகே வா இல்லையா?

OK ன்னா இதோட நிறுத்திக்கறேன். இல்லைன்னா அதை கழட்டறதுக்கான உங்க முயற்சி கருத்து என்ன?
அதைப்பத்தி ஒரு வரியும் காணோம்!
//

என்னோட பதில் ! முந்தைய பதிவிலேயே, அங்கு வரும் பின்னூட்டங்களுக்கு கி.அ.அ.அ அவர்களே பதில் சொல்வாருன்னு போட்டிருந்தேன்! நம்ம "அத்திம்பேர் பையன் தம்பி" என்னிடம் கேட்ட கேள்விக்கு, கி.அ.அ.அ சிறப்பாகவே, ஆக்கபூர்வமாகவே பதில் சொல்லியிருக்காரு. ஆனாப் பாருங்க, தம்பி நீங்க உடனே என் மேல் பாயறீங்க, "எனக்கு இந்த விளையாட்டு வரலை" அப்டின்னு!

அப்புறம், அந்த போர்ட் இருக்கறது எனக்கு ஓகேவான்னு ஒரு கேள்வி கேட்கறீங்க ! பதிவிலே தந்த 'எனது' டிஸ்கிலே, அது அகற்றப்பட வேண்டியது என்று தெளிவாகவே குறிப்பிட்டு இருக்கேன். அதற்கு "நாம்" முயற்சி எடுக்கணும் என்றும் கூறியிருக்கேன் !

அந்த போர்டை வச்சு ஜல்லியடிச்சவங்க கிட்ட, கி.அ.அ.அ. 2 கேள்விகள் கேட்டிருந்தாரு. அவங்க முதலில் பதில் தரட்டும். அவங்க முதலில் முயற்சி எடுக்கட்டும், அவங்களுக்கு உதவி செய்ய நிச்சயம் நானும் வருகிறேன். நான் விசாரித்ததில், ராமேஸ்வரத்துல உள்ள DC (Deputy collector) கிட்ட ஒரு புகார் கடிதம் முதலில் அளிக்க வேண்டும் என்று தெரிய வந்தது.

நியாயமா, "கி.அ.அ.அ வின் அத்திம்பேர் பையன் தம்பி" யான நீங்க போர்ட் படமெடுத்துப் போட்ட மற்றும் அது பற்றி "ஆய்ந்து" எழுதிய பதிவர்களிடம், "இந்த போர்டை எடுக்க நீங்கள் என்ன செய்தீர்கள் ? அது அங்கிருப்பது சம்மதமா?" என்று முதற்கண் கேள்வி கேட்டிருக்க வேண்டும் என்பதே என் ஆதங்கம் !!!!!!

ரொம்ப போரடிச்சுட்டேனா ? Bye for now!

என்றென்றும் அன்புடன்
பாலா

*** 322 ***

321. அநாகரிக அறிவிப்புப் பலகையும் ஆனந்த கும்மியும்

முதலில் எ.அ.பாலா டிஸ்கி மற்றும் எண்ணங்கள்:
---------------------------------------------------------------------------
கி.அ.அ.அனானி கீழே குறிப்பிட்டுள்ள கோயில் அறிவிப்புப் பலகை வைக்கப்பட்ட செயலை வன்மையாக கண்டிக்கிறேன். சாதி துவேஷத்திற்கு தூபம் போடும் அந்தப் பலகை உடனடியாக தூக்கியெறியப்பட நடவடிக்கை எடுக்கப்பட வேண்டும், அதற்கு நாம் முயற்சிகள் எடுக்க வேண்டும் என்பதிலும் மாற்றுக் கருத்தில்லை.

நண்பர் பாலபாரதி அந்த போட்டோவை எடுத்துப் போட்டது தவறு என்றும் நான் வாதிட வரவில்லை! அதைத் தொடர்ந்து நடந்த வலைக்கூத்து பற்றியே கி.அ.அ.அ தன் பாணியில் எழுதியிருக்காரு ! A coin has two sides and it is imperative that an unbiased reader is given the opportunity to see an issue in different perspectives!

இந்த மேட்டர் குறித்த மாற்றுப் பார்வையாக நான் அதைக் கருதுவதாலும், அதனால் இங்கிருக்கும் சிலருக்காவது ஒரு 'புரிதல்' ஏற்பட வாய்ப்பிருப்பதாலும், கருத்துச் சுதந்திரத்தின் மேல் எனக்கிருக்கும் அசைக்க முடியாத நம்பிக்கையாலும், "யான் பெற்ற இன்பம், (மன்னிக்கவும், எப்போதும் போல் சொல்லி விட்டேன்!) தெளிவு பெறுக இவ்வையகம்" என்ற பரந்த நோக்கிலும் கி.அ.அ.அனானியின் மேட்டரை பதிவாக இடுகிறேன்!!! பதிவுத் தலைப்பு மட்டும் என்னுடையது. மேட்டர் கி.அ.அ. அனானியுடையது !

என்னிடம், யார் மீதும், தனிப்பட்ட வாகையில் காழ்ப்பு இல்லை என்பது, என் வாசகர்களுக்கும், என்னை அறிந்த நண்பர்களுக்கும் தெரியும் என்று நம்புகிறேன்!

கி.அ.அ.அ அவர்களும், இப்பதிவின் இறுதியில் ஒரு டிஸ்கி தந்துள்ளார் :) இப்பதிவுக்கு வரும் பின்னூட்டங்களுக்கு கி.அ.அ.அ. அவர்களையே பதில் தருமாறு கேட்டுக் கொள்கிறேன் !!! நானும் அவ்வப்பொழுது ஆட்டத்தில் கலந்து கொள்வேன் என்று உறுதி கூறுகிறேன்!!! கி.அ.அ.அ மேட்டர் பதிவாக கீழே !
************************************
சம்பந்தப்பட்ட போர்டு போட்டோ இங்க இருக்குங்கோவ்... நண்பர் பாலபாரதி's posting

ராமேசுவரம் கோவிலில் இப்படி ஒரு போர்ட் மாட்டப்பட்டிருப்பதை படம் பிடித்து பதிவு போட அதற்கு இன்னொரு 'அதிர்ஷ்ட'ப் பதிவர் "செருப்பாலடி" (இவரு போர்டு மாட்டுனவனையா இல்லை பதிவு போட்டவனையா, யாரை செருப்பாலடிக்க சொன்னார் என்பது அந்த ராமநாத சாமிக்கே வெளிச்சம்) என்று ஒரு பதிவு போட அந்த ஜல்லியை இன்னுமொரு 'திரு'வாளர் நீளமா நீட்டி, தேசிய ஜல்லியெல்லாம் அடித்து, கான்கிரீட் கலவை போட்டு இப்படி ஆளாளுக்கு தங்களது சமூக அக்கறையை பலமாக பறை சாற்றியிருக்கிறார்கள்.

இவர்களிடம் நாம் கேட்பதெல்லாம் இரண்டே கேள்விகள்:

1. ஆட்சியில் இருந்து கொண்டிருப்பது சமூக நீதி காக்கும் அரசு தானே, அதுவும் 40 வருடங்களுக்கு மேலாக.. கோவில் மற்றும் அதை நிர்வகிக்கும் அறநிலையத் துறை எல்லாம் இவர்கள் கையில் தானே இருக்கிறது.. அப்புறம் இந்த போர்டை அகற்றவோ அல்லது அப்படி எழுதி வைத்தவர் மீது நடவடிக்கை எடுக்கவோ ஏன் துப்பில்லை ?

2. இதை மெனக்கெட்டு போட்டோவெல்லாம் எடுத்து வந்து பிளாகில் பதிப்பித்து விவாதிக்கும் பதிவர் திலகங்கள், பின்னூட்டச் சக்ரவர்த்திகள் ஆகியோர் "உன் ஆள்" தான் அதை வைத்தான் என்று வெட்டிக் கூச்சல் போட்டு பிலிம் காட்டுவது தவிர அந்த மாதிரி துவேஷம் வளர்க்கும் போர்டை அகற்றவும், அதை வைத்தவரை அடையாளம் கண்டு தண்டிக்கவும், அதனால் சமூக நீதி காக்கவும் செய்ய ஏதேனும் துரும்பையாவது கிள்ளிப் போட்டார்களா ?

இம்மாதிரி கேள்விகளுக்கு பதில் நிச்சயம் வராது என்று தெரியும்... ஏனென்றால், இந்த மாதிரி விஷயங்களை வைத்துத் தானே இங்கு அரசியல் வியாபாரம் ஜாம் ஜாமென்று நடக்கிறது.. பெரியார் சிலையை ஸ்ரீரங்கம் கோவில் வாசலில் வைக்க போராடி வெற்றி பெற்றதாக மார் தட்டும் கழகச் சிங்கங்களுக்கு, (அதை விடவும்) இந்த போர்டையும் இதை வைத்தவர்களையும் தூக்கியெறிந்தால் பெரியார் கொள்கைகளையும் அவர் காக்கப் போராடிய சமூக நீதியை சிறிதளவேனும் முன்னெடுத்துச் சென்றதாக இருக்கும் என்ற 'சிற்றறிவு' கூடவா இல்லாதிருக்கும் ?

இணைய கும்மிகளிடமும் அதே போக்கு தானே நிலவுகிறது.. அதனால் தான், போட்டோ பிடித்து 'படம்' காட்டுவதோடும், பார்ப்பனீயத்தை எதிர்க்கிறேன் என்ற போர்வையில் பார்ப்பனர்களை நாலு திட்டு திட்டி விட்டு, நமக்கு நாமே திட்டத்தில் நாலு பின்னூட்டமும் போட்டு முதுகு சொறிந்து கொண்டு, சமூக நீதியைக் காப்பாற்றி விட்டதாக மார் தட்டிக்கொள்வதோடும், விவாதிக்கப்படும் விஷயம் abrupt-ஆக நின்று போய் விடுகிறது. ஏனென்றால் இவர்களெல்லாம் ஜாதீயத்தை, மன்னிக்கவும், பார்ப்பனீயத்தை ஐடியலாஜிகல் தளத்தில் எதிர்ப்பவர்கள்.. Meaning, வெட்டி அரட்டை அடித்து ஜால்ரா தட்டுவார்கள்.. கும்மியடிப்பார்கள்.. ஜல்லி அடிப்பார்கள், அதோடு சரி.

இவர்கள் இந்த மாதிரி போர்டையும் அகற்ற (அல்லது அதற்கான முயற்சியெடுக்க) மாட்டார்கள்... நான் முந்தைய பதிவில் குறிப்பிட்டிருந்த பள்ளிகளில் "இரட்டைப் பானை" மற்றும் டீக்கடைகளில் "இரட்டை டம்ளர்" பற்றியெல்லாம் பேசாமல் "திரு"ட்டு மெளனம் சாதிப்பார்கள் (அல்லது) தங்களை அம்மாதிரி விடயங்களிலிருந்து வி"லக்கி"க் கொண்டு எஸ்கேப் ஆவார்கள் :) (ஸ்மைலி எ.அ.பாலா போட்டது!!!)

ஆட்சி கையில இருந்தும் ஒண்ணும் கழட்ட முடியாம (போர்டை சொன்னேங்க ;-)) இப்படிப்பட்ட கையாலாகாதவனா இருக்கமே அப்படீன்னு வேணா ...... அடிச்சுக்கிடலாம்!

இதுக்கு "நான் பார்ப்பனனில்லை.. இந்த போர்டை நான் வைக்கவில்லை / சத்தியமா ஆதரிக்கவில்லை, இந்த போர்டை வச்சவன் நாசமாப் போக நானும் கடவுளை வேண்டிக் கொள்கிறேன்"

இப்படியெல்லா டிஸ்கி போடணும் தானே... சரி மக்கா, அப்படியே போட்டுருவோம்.
*************************************

(எ.அ.பாலா: கி.அ.அ.அ. நாத்திகர் இல்லைன்னு அவரது டிஸ்கி காட்டிக் குடுத்திருச்சு!)

*** 321 ***